Թուրքմենստանը կօգնի նվազեցնել Չինաստանի գազային կախվածությունը Մոսկվայից

Թուրքմենստանի նախագահ Գուրբանգուլի Բերդիմուհամեդովը այսօր քառօրյա պետական այցով ժամանել է Չինաստան և հանդիպումներ է ունենալու այդ երկրի առաջնորդ Սի Ձինպինի և կառավարության ներկայացուցիչների հետ:

Թուրքմենա-չինական հարաբերությունները վերջին տասնամյակների ընթացքում ակտիվորեն զարգացել են և երկրների առաջնորդները Պեկինի և Աշգաբադի հարաբերությունները գնահատում են որպես ռազմավարական:

Թուրքմենստանի և Չինաստանի միջև կապերի ամրապնդմանը նոր լիցք է հաղորդել Չինաստանի առաջնորդ Սի Ձինպինի պետական այցը Թուրքմենստան՝ 2013թ.-ի սեպտեմբերի 2-3-ը: Այցի ընթացքում ստորագրվել են 13 համաձայնագրեր՝առևտրա-տնտեսական կապերի ընդլայնման ուղղությամբ:

Սի Ձինպինը Թուրքմենստանում մասնակցել է Գալկինիշ գազային հանքավայրի շահագործման մեկնարկի արարողությանը: Այդ հանքավայրից գազը կարտահանվի Չինաստան և ընդհանուր առմամբ թուրքմենական գազի Չինաստան արտահանման ծավալները կհասնեն տարեկան 65 միլիարդ խմ-ի: Նախորդ տարի Թուրքմենստանը Չինաստան է արտանահել 60 միլիարդ խմ գազ:

Չինաստանը Գալկինիշի հանքավայրի շահագործման համար արդեն ներդրել է 8 միլիարդ դոլար: Թուրքմենստանը դեպի Չինաստան նոր գազամուղի կառուցմամբ ցանկանում է նվազեցնել իր էներգետիկ կախվածությունը Մոսկվայից, որը տարիներ շարունակ հանդիսանում էր թուրքմենական գազի գլխավոր գնորդը: 

Կողմերը պայմանավորվել են նաև սկսել Կենտրոնական Ասիա-Չինաստան գազամուղի նոր ճյուղավորումների շինարարությունը, որոնք կանցնեն Ուզբեկստանի, Տաջիկստանի և Ղրղզստանի տարածքով: Նախատեսվում է, որ այդ գազամուղերով Չինաստան կարտահանվի ևս 25 միլիարդ խմ գազ: 

Իր թուրքմենական այցի ընթացքում Սի Ձինպինը հայտարարել էր, որ Չինաստանը հանդիսանում է Թուրքմենստանի խոշորագույն առևտրային գործընկերը և Պեկինը ցանկություն ունի ընդլայնել երկկողմ կապերը առևտրի, էներգետիկայի, հումանիտար և այլ ոլորտներում:

Թուրքմենստանի նախագահը իր հերթին նշել էր, որ Չինաստանը Թուրքմենստանի վսհատելի գործընկերն է և վերջին շրջանում հատկապես ակտիվացել է էներգետիկ ոլորտում համագործակցությունը:

Բերդիմուհամեդովը նշել էր, որ Աշգաբադի համար Չինաստանի հետ բարիդրացիական հարաբերությունների կառուցումը արտաքին քաղաքականության առաջնահերթություններից է: 

Թուրքմենստանում Չինաստանի արտակարգ և լիազոր դեսպան Սյաո Ցինխուան Բերդիմուհամեդովի Պեկին կատարած այցին ընդառաջ հայտարարել է, որ 10 տարվա ընթացքում երկկողմ ապրանքաշրջանառությունը աճել է 100 անգամ և այս պահին հասնում է 10 միլիարդ դոլարի: Դեսպանը նշել է, որ 2009թ.-ին Թուրքմենստան-Չինաստան գազամուզի շահագործումից հետո Պեկինը և Աշգաբադը սկսել են միմյանց դիտարկել որպես էներգետիկ ոլորտում կարևոր գործընկերներ:

Ցինխուան նշել է, որ այս պահին Թուրքմենտանում գործում է 22 չինական ընկերություն, Թուրքմենստանում ակտիվորեն ուսումնասիրում են չինարեն լեզուն, իսկ հազարավոր թուրքմեն ուսանողներ ուսում են ստանում Չինաստանի ԲՈւՀ-րում:

Թուրքմենստանի նախագահի Չինաստան քառօրյա այցի շրջանակներում Բերդիմուհամեդովը հանդիպումներ կունենա կառավարական և գործարար շրջանակների հետ, իսկ այցի արդյունքներով նախատեսվում է ստորագրել մի շարք համաձայնագրեր: 

Արտյոմ Բալասանով

Նախորդող հրապարակումներ՝

Կենտրոնական Ասիայի տարածաշրջանը` Չինաստանի կենսական շահերի տարածք

Չինաստանը ռեսուրսների սակավությունը փոխհատուցելու է Աֆրիկայի հաշվին