Փոխնախարար. Եթե այլ անակնկալներ չգրանցվեն, գյուղատնտեսության ոլորտում կլինի տնտեսական զգալի աճ

Մարտի 30-ից ապրիլի 1-ն ընկած ժամանակահատվածում տեղի ունեցած ցրտահարության վնասն այս պահի հաշվարկներով կազմում է մոտ 12 մլրդ դրամ, վնասվել է 9185 հա 287 համայնքներում: Panorama.am-ին նման տվյալներ փոխանցեց գյուղատնտեսության փոխնախարար Գառնիկ Պետրոսյանը:

Նրա խոսքով, մարտի 31-ին և ապրիլի 1-ին հանրապետությունում գրանցված ցրտահարությունների ու ձյան տեսքով առատ տեղումների հետևանքով շուրջ 90%-ով կորստի մատնվեց ծիրանի բերքը: Փոքր չափով տուժեցին ծաղկման փուլում գտնվող կորիզավոր պտղատեսակների որոշ սորտեր, նկատվել են նաև խաղողի Շահումյանի, Իծապտուղ սորտերի կենտրոնական աչքերի թույլ վնասվածքներ, որոնք բերքատվության վրա էական ազդեցություն չեն ունենա:

Չնայած այս ամենին, նախարարությունում տարին գյուղատնտեսության համար բավականին բարենպաստ են համարում:

«Ընթացիկ տարին, այսօրվա դրությամբ, բավականին բարենպաստ է գյուղատնտեսության համար: Եթե այլ անակնկալներ չգրանցվեն, ապա տարվա արդյունքներով, նախորդ տարվա համեմատությամբ, կգրանցվի զգալի տնտեսական աճ»,-ասաց Գ. Պետրոսյանը:

Փոխնախարարի խոսքով, բարձր բերք է սպասվում հացահատիկային, բանջարաբոստանային, կերային մշակաբույսերի, կարտոֆիլի ցանքերից, դեղձենու, խնձորենու, տանձենու, խաղողի այգիներից:

Ինչ վերաբերում է անընդհատ դարձած կարկուտներին ու ուժեղ քամիներին, ապա նախարարությունից հայտնեցին, որ դրանց հետևանքով գրանցված վնասները մեծ չափերի չեն հասնում, սովորական բնույթ են կրում և չեն գերազանցում բազմամյա միջին արդյունքները:

Ցրտահարության հետևանքով ըստ մարզերի, առանձին պտղատեսակների զբաղեցրած տարածքների, բերքի կուրուստների վերաբերյալ Panorama.am-ին տրամադրած տեղեկանքը կարող եք ուսումնասիրել այստեղ: