Դավիթ Մուրադյանը Երևանի թատրոնի և կինոյի պետական ինստիտուտը ղեկավարելու է հինգ տարի

Կառավարության վաղվա նիստում հաստատվելու են «Երևանի թատրոնի և կինոյի պետական ինստիտուտ» պետական ոչ առևտրային կազմակերպության ռեկտորի պաշտոնում Դավիթ Մուրադյանի ընտրության արդյունքները: Այս մասին տեղեկանում ենք կառավարության պաշտոնական կայքից: 

Հիշեցնենք, որ Երևանի թատրոնի և կինոյի պետական ինստիտուտի ռեկտորի ընտրությունը կայացել է հունիսի 2-ին: Հայտարարված մրցույթին մասնակցել է միայն գրող, կինոգետ, Հայկական ազգային կինոակադեմիայի նախագահ, Երևանի թատրոնի և կինոյի պետական ինստիտուտի պրոֆեսոր, ՀՀ արվեստի վաստակավոր գործիչ Դավիթ Մուրադյանը:

Կառավարության նիստում որոշման նախագիծը ներկայացնելու ԿԳ նախարար Արմեն Աշոտյանը: Ըստ նախագծի, օրենսդրությամբ սահմանված կարգով Դ.Մուրադյանի հետ կնքվելու է աշխատանքային պայմանագիր` 5 տարի ժամկետով:

Հիշեցնենք, որ Արմեն Մազմանյանի մահից հետո «Երևանի թատրոնի և կինոյի պետական ինստիտուտ» պետական ոչ առևտրային կազմակերպության տնօրենի պարտականությունների կատարումը հունվարի 13-ից ստանձնել էր ինստիտուտի ընդհանուր հարցերով և ֆինանսատնտեսական գծով պրոռեկտոր Հովիկ Մինասյանը: Ապրիլի 11-ից ռեկտորի պաշտոնակատար էր նշանակվել Դավիթ Մուրադյանը:

Նախորդող հրապարակումներ՝

Նորընտիր ռեկտոր Դավիթ Մուրադյան. «Կփորձեմ լինել այդ պատասխանատվությանը արժանի»

Դավիթ Մուրադյանը ցանկանում է դառնալ Երևանի թատրոնի և կինոյի պետական ինստիտուտի ռեկտոր