Կանցկացվի լավաշի և հայկական ուտեստի փառատոն

Արագածոտնի մարզի Նոր Արթիկ գյուղում «Էրգրի համի հիշողություն» հայկական ուտեստի փառատոնի շրջանակում հոկտեմբերի 18-ին կանցկացնի «Լավաշի և հայկական ուտեստի փառատոն»: Այս մասին հայտնում են մշակույթի նախարարությունից:

Փառատոնը կազմակերպվում է երկրորդ անգամ ընդգրկելով մարզի ընտանիքներին, կրթական և հասարակական կազմակերպություններին: Ուսումնասիրվել են մարզի համայնքներում ավանդական համարվող առողջ, անարատ ու համեղ կերակրատեսակներ՝ հատկապես հացամթերքով և բուսական բաղադրությամբ ճաշատեսակներ, ընտրվել են դրանց պատրաստման գաղտնիքներին տիրապետող կանայք, ովքեր և իրենց գործուն մասնակցությունը կբերեն փառատոնին:

Նկատի ունենալով, որ ՀՀ կառավարության որոշմամբ 2014 թվականը Հայաստանում հայտարարվել է ընտանիքի տարի, փառատոնի մասնակիցները ներկա կգտնվեն համայնքի հարգարժան ընտանիքներից մեկի ոսկե հարսանիքին, ականատես կլինեն լավաշի և այլ հացամթերքների պատրաստմանը, որոնք կհամտեսվեն գյուղական ընտանիքի հացատանը՝ թոնրի շրթին:

Մասնակից համայնքները, դպրոցներն ու հասարակական կազմակերպություններն իրենց հյուրընկալ սեղանները կբացեն՝ ներկայացնելով ազգային, ավանդական ճաշատեսակներ, աղանդերներ և քաղցրավենիքներ:
Փառատոնը կազմակերպում է «Աշտարակի տարածաշրջանի կանանց ասոցիացիա» հասարակական կազմակերպությունը՝ մշակույթի նախարարության և Արագածոտնի մարզպետարանի աջակցությամբ: