Թուքիայում ավտովթարից մահացել է իրանական «Press.tv» հեռուստաալիքի թղթակիցը

«Թուքիայում ավտովթարից մահացել է իրանական «Press.tv» հեռուստաալիքի թղթակիցը»,-այդ մասին հաղորդում է իրանական «ԻՌԻԲ» լրատվական գործակալությունը:

Համաձայն հաղորդագրության՝ կիրակի օրը «Press.tv» հեռուստաալիքի թղթակից Սերենա Շիմը Թուրքիայում տեղի ունեցած ավտովթարի հետևանքով մահացել է:

«Press.tv»-ն հաստատել է իր թղթակցի մահվան մասին լուրը, սակայն այդ կապակցությամբ մանրամասներ չի հաղորդել:

Իրանական աղբյուրը, անդրադառնալով վերոնշյալ միջադեպին, գրում է. «Այս դեպքը տեղի է ունենում այն պայմաններում, երբ Թուրքիայի անվտանգության ուժերը նախորդ շաբաթ Սերենա Շիմին մեղադրել էին կառավարության ընդդիմադիրների օգտին լրտեսություն կատարելու մեջ»:

«Press.tv»-ն հայտարարել է, որ նման մեղադրանքների հիմքում ընկած են Սիրիայի Քոբանի քրդաբնակ քաղաքի իրադարձությունների կապակցությամբ Թուրքիայի կառավարության որդեգրած դիրքորոշումների վերաբերյալ Շիմի պատրաստած հաղորդումները: