Լոնդոնում բացվելու է Էլվիս Փրեսլիին նվիրված ամենամեծ ցուցահանդեսը

Էլվիս Փրեսլիի հայտնի վարդագույն Cadillac-ը, ադամանդե մատանին, բեմական կոստյումները ԱՄՆ-ից տեղափոխվում են Մեծ Բրիտանիա, որտեղ դեկտեմբերի 12-ին բացվելու է Եվրոպայում ամենամեծ ցուցահանդեսը՝ նվիրված «ռոքնռոլ արքային»: Այս մասին գրում է Ռիա նովոստին:

Արդեն այսօրվանից սկսվում է ցուցահանդեսի տոմսերի վաճառքը: Ցուցադրվելու է ավելի քան 300 ցուցանմուշ, որոնց թվում է նաև կիթառը, Փրեսլիի անձնական իրեր, լուսանկարներ:

Կազմակերպիչների կարծիքով, ցուցահանդեսը հնարավորություն կտա պատկերացում կազմել երգչի կյանքի բոլոր շրջանների մասին: Ցուցահանդեսը բացվելու է Լոնդոնի հայտնի «О2» ցուցասրահում: Գործելու է մինչև 2015 թ. օգոստոսի 31-ը:

20-րդ դարի ամենահայտնի և նշանավոր ամերիկացի երգիչներից Էլվիս Փրեսլին մահացել է 1977 թվականին 42 տարեկանում, բայց նրա երգերը շարունակում են թողարկվել: