Հայ ուսանողությունը նույնպես քայլում է մեր երկրի հասարակական կյանքի բոլոր զարգացումներին համընթաց. Աշոտյան

ՀՀ ԿԳ նախարար Արմեն Աշոտյանը շնորհավորական խոսքը է հղել Ուսանողների համաշխարհային օրվա կապակցությամբ:

«Սիրելի’ ուսանողներ,

Ընդունեք իմ ջերմ շնորհավորանքներն ու բարեմաղթանքներն Ուսանողների միջազգային օրվա կապակցությամբ:
Նոյեմբերի 17-ը ողջ աշխարհում նշվում է որպես Ուսանողների համաշխարհային օր:

Աշխարհի բոլոր պետություններում ուսանողներն ակտիվ ներգրավված են ներքին և արտաքին հիմնախնդիրների լուծմանը միտված գործընթացներում: Մրցունակ գիտելիքներով հարուստ ուսանողությունը կարող ուժ է յուրաքանչյուր պետության զարգացման գործընթացում՝ միաժամանակ լինելով պետության հզորության և առաջընթացի գրավականը:

Հայ ուսանողությունը նույնպես քայլում է մեր երկրի հասարակական կյանքի բոլոր զարգացումներին համընթաց, դրանց ակտիվ մասնակիցն ու իրականացնողն է: Մեր ուսանողությունը հայաստանյան կրթական համակարգի հիմնական հենասյուներից մեկն է, ուստի յուրաքանչյուր ուսանողից պահանջվում է՝ լինել առավել ակտիվ ու ներգրավված կրթության ոլորտում ընթացող գործընթացներում: Այսօր իրականացվող լայնածավալ կրթական բարեփոխումների հաջողության գրավականը գիտելիքի արժևորումն է, մասնագիտական բարձր պատրաստվածությունը, ձեր քաղաքացիական գիտակցությունը, ինչպես նաև սեփական անձի նկատմամբ ցուցաբերած պահանջկոտությունը: Ներկայիս ուսանողության ձգտումներով, երազանքներով ու հաստատակամությամբ է պայմանավորված մեր պետության վաղվա օրը:

Հուսով եմ նաև, որ ՀՀ կրթության և գիտության նախարարության առաջարկությունը՝ մայր բուհի ստեղծման օրը՝ մայիսի 16-ը, նշել որպես Ուսանողների և երիտասարդների օր, մոտ ժամանակում պաշտոնապես կընդգրկվի պետական տոնացույցում և նոր լիցք ու խանդավառության կհաղորդի մեր երկրի երիտասարդներին:

Մեկ անգամ ևս շնորհավորում եմ ՀՀ ուսումնական հաստատություններում սովորող տեղացի ու արտասահմանցի բոլոր ուսանողներին Ուսանողների միջազգային օրվա կապակցությամբ և մաղթում հաստատուն կամք, եռանդ, ուսման մեջ հաջողություններ ու բոլոր նպատակների իրականացում»,-ասված է նախարարի շնորհավորական խոսքում: