Ռուսաստանն արևմտյան պատժամիջոցներին կարող է պատասխանել Մաքսային միության շրջանակներում. Լավրով

Ռուսաստանի Դաշնությունը դիտարկում է արևմտուքի կողմից հակառուսական պատժամիջոցներին Մաքսային միության շրջանակներում պատասխանելու հնարավորությունը: Այս մասին, «Ռիա Նովոստի» գործակալության տեղեկացմամբ, հայտարարել է ՌԴ ԱԳ նախարար Սերգեյ Լավրովը:

Նախարարի խոսքերով, Մաքսային միությունն օժտված է անհրաժեշտ նորմատիվ-իրավական բազայով՝ որն հնարավորություն է ընձեռում պատասխան քայլեր ձեռնարկել առևտրի ոլորտում ՄՄ անդամ որևէ երկրի նկատմամբ երրորդ երկրների կողմից տնտեսական ճնշման դեպքում:

«Չենք բացառում, որ նման անհրաժեշտություն կծագի ապագայում»,-գործակալությունը մեջբերում է նախարարի խոսքերը:

Լավրովը պարզաբանել է նաև, թե հաշվի առնելով Ռուսաստանի նկատմամբ արևմուտքի տնտեսական պատժամիջոցների միակողմանի ուղղվածությունը, «պատասխան քայլերը ևս ձեռնարկվել են միակողմանիորեն՝ այն երկրների նկատմամբ, որոնք ընդունել են այդ որոշումները կամ միացել դրանց»: