Պուտին. Տնտեսական խնդիրները կապված են նաև կառավարության թերի աշխատանքի հետ

Տնտեսության մեջ արձանագրված դժվարությունները կրում են ոչ միայն արտաքին գործոնների ազդեցությունը, այլ նաև պայմանավորված են կառավարության աշխատանքի թերացումներով: Անդրադառնալով Ռուսաստանի տնտեսական խնդիրներին` նշել է ՌԴ նախագահ Վլադիմիր Պուտինը: Փոխանցում է «ՏԱՍՍ» լրատվական գործակալությունը: 

«Դժվարությունները, որոնց մենք բախվում ենք, կրում են ոչ միայն արտաքին բնույթ և ոչ էլ միայն կապված են պատժամիջոցների ու սահմանափակումների հետ, որոնք պայմանավորված են միջազգային հարաբերությունների օբյեկտիվ կոնյուկտուրայով, այլ նաև կապված են մեր համատեղ աշխատանքում առկա թերացումների հետ, որոնք կուտակվել են տարիների ընթացքում»,- կառավարության անդամների հետ հանդիպման ժամանակ հայտարարել է ՌԴ նախագահ Վ. Պուտինը:

Պուտինը նշել է, որ առկա իրավիճակը հասել է «պատմական մակարդակի», ուստի անհրաժեշտ է փոխել տնտեսության կառուցվածքը` վերջինիս տալով ավելի նորարարական բնույթ: Ըստ Պուտինի` այս ուղղությամբ քայլեր իրականացվել են, բայց վերջին զարգացումները ցույց են տվել, որ դրանք բավարար չեն եղել:

Այդուհանդերձ Պուտինը շնորհակալություն է հայտնել կառավարության անդամներին դժվարին օրերին միասնական աշխատան իրականացնելու համար և տեղեկացրել նրանց, որ երկարատև տոնական արձակուրդ չեն ունենալու: Պուտինի խոսքով` կառավարական գերատեսչությունները պետք է էլ ավելի կորդինացնեն իրենց համատեղ աշխատանքը և անցում կատարեն «ձեռքով կառավարման» մոդելին: Ըստ Ռուսաստանի նախագահի` դրանում որևէ արտառոց բան չկա, քանի որ երկրի համար այն ներկա պահին բացարձակ անհրաժեշտություն է:

Որպես կառավարության աշխատանքի հիմնական թիրախներ` Պուտինը նշել է ռուբլու փոխարժեքի կարգավորումը և սոցիալական ապահովության հարցերը: