«ԱԱԾ-ն երևի ղեկավարվում է 1933թ. ԽՍՍՌ Կենտգործկոմի ինչ-որ մի որոշմամբ». փաստաբան

Փաստաբան Տիգրան Աթանեսյանը դեռևս չի կարողանում ստանձնել ԱԱԾ վարույթում քննվող քրեական գործի շրջանակներում «ԱրմենՏել»-ի նախկին գլխավոր տնօրեն Իգոր Կլիմկոյի պաշտպանությունը: Այս մասին ֆեյսբուքյան իր էջում գրել է Տիգրան Աթանեսյանը:

«Ինչպես նշել եմ նախկինում, Կենտրոնի դատարանի դատավոր Ա.Բեկթաշյանը քննում է իմ համապատասխան բողոքը, սակայն նիստերը փաստացի չեն կայանում, քանի որ ԱԱԾ ներկայացուցիչները չեն ներկայանում: Երևի ղեկավարվում են, ասենք, 1933թ. ԽՍՍՌ Կենտգործկոմի ինչ-որ մի որոշմամբ: Չեմ կարող հասկանալ այս համառ մերժումները և դիրքորոշումները: Այս փուլում ինձ պետք է տրամադրվեն սակավաթիվ փաստաթղթեր՝ որոշումներ որպես մեղադրյալ ներգրավելու մասին, հետախուզման և կալանավորման որոշումներ, փորձաքննությունների եզրակացություններ և այլն: Թե ինչ կարող է պարունակվել այդ փաստաթղթերում, որ ԱԱԾ-ն չի ցանկանում պաշտպանության կողմը ծանոթանա, մնում է միայն ենթադրել»,- գրել է Տ. Աթանեսյանը:

Նախորդող հրապարակում՝
«ԱրմենՏելի» նախկին գլխավոր տնօրենի գործով դատական նիստը հետաձգվել է ԱԱԾ ներկայացուցիչների բացակայության պատճառով
«ԱրմենՏելի» նախկին գլխավոր տնօրենը համոզված է, որ առկա քրեական հետապնդումը որևէ կապ չունի իր հետ. փաստաբան