2015 թվականին Ադրբեջանի նավթագազային սեկտորում սպասվում են կորուստներ և կրճատումներ

Ադրբեջանի  ևս մեկ խոշոր ընկերությունում Ամանորից սկսած մեկնարկելու են հաստիքային աշխատակիցների կրճատումներ: Ինչպես պարզել է ադրբեջանական «Թուրան» լրատվական գործակալությունը, 2015-ից Statoil Azerbaijan ընկերությունը ծրագրել է 50 տոկոսով կրճատել իր աշխատակիցներին: 

 

Ընդ որում՝ կրճատվելու են ոչ միայն Ադրբեջանի քաղաքացիները, այլ նաև  ընկերության օտարերկրացի աշխատակիցները: 

 

Նշենք, որ Statoil ընկերությունում կրճատումների պատճառը միայն նավթի գնի նվազումը չէ:  Խնդիրն այն է, որ ընկերությունն ընթացիկ տարում որոշել է ամբողջությամբ լքել «Շահդենիզ»  նախագիծը և  Հարավկովկասյան գազամուղը, որտեղ մեկ տարի առաջ ուներ 25,5 տոկոս, այնուհետև` 15,5 տոկոս բաժնետոմներ:

 

Ներկայումս  Statoil-ը պասիվ բաժնետեր է համարվում այնպիսի նախագծերում, ինչպիսիք են «Ազերի-Չիրագ-Գյունեշլի» (8,6 տոկոս) և Բաքու-Թբիլիսի-Ջեյհան նավթամուղը (8,7 տոկոս): 

 

Նկատենք,  որ  նախքան այս դեպքը, ВР Azerbaijan ընկերությունը հայտարարել էր 2015-ի հունվարի մեկից իր աշխատակազմի թվաքանակի կրճատման մասին:   Ինչպես նշել է Ադրբեջանի պետական նավթային ընկերության (SOCAR)  տնտեսական հարցերով փոխնախագահ Սուլեյման Հասիմովը, 2015-ին նավթի մեկ բարելի դիմաց 60 դոլար պայմաններում SOCAR –ի  կորուստները կարող են կազմել 400 մլն մանաթ (ընթացիկ կուրսով մոտ 510 մլն ԱՄՆ դոլար):

 

Հասիմովի խոսքերով՝ SOCAR-ի կողմից ստացվող նավթի միջին ինքնարժեքը  մեկ տոննայի դիմաց կազմում է  100 մանաթ, իսկ բարելին անցում կատարելու դեպքում` մոտ 17  դոլար մեկ բարելի դիմաց:  Նա նշել է, որ ընկերության արտահանման ծավալները  շատ չեն, իսկ նավթի շահույթը  հիմնականում ուղղված է  ներքին պահանջարկի բավարարմանը:
 

Գործակալությունը նշում է նաև, որ 100 տոկոսով կառավարության կապիտալով գործող «Հարավային գազային միջանցք» ՓԲԸ-ն գալիք տարի  Ադրբեջանի ֆինանսների նախարարությունից կստանա 1 մլրդ 341,2 մլն մանաթ կամ  1,7 մլրդ դոլար՝ ռիսկերին դիմակայելու համար:

«Հարավային գազային միջանցք» ՓԲԸ -ն, ակնկալվում է, որ պետք է արդյունավետորեն ղեկավարի «Շահդենիզ» գազակոնդենսատային հանքավայրի շահագործման երկրորդ փուլի ծրագիրը, Հարավկովկասյան, ինչպես նաև  TANAP и TAP  գազամուղների ընդլայնման ու կառուցման ծրագրերը:  Վերջիններիս անհրաժեշտ նյութական միջոցները հատկացնում է Ադրբեջանի պետական նավթային ընկերությունը: Ըստ պաշտոնական տվյալների՝ սույն ՓԲԸ-ին միջոցներ են հատկացվել երկարատև ներդրումների ձևաչափով հետ վերադարձնելու պայմանով:

 

Նյութեր թեմայի շուրջ՝