Եթե Հայաստանի տնտեսությունը կախված լինի միայն Ռուսաստանից, ապա տանուլ կտանք. Գագիկ Մակարյան

«Հաշվի առնելով համաշխարհային տնտեսությունում առկա փոփոխությունները, Ռուսաստանի տնտեսության վիճակը, կարող ենք ասել, որ դոլարի փոխարժեքը շարունակելու է բարձրանալ, իսկ ռուսական ռուբլին դեռևս մի քանի ամիս կգտնվի հոգեվարքի մեջ»,- այս մասին Panorama.am-ի թղթակցի հետ զրույցում ասաց Հայաստանի գործատուների միության նախագահ Գագիկ Մակարյանը:

Նրա խոսքերով` ռուբլու շարունակվող արժեզրկումը և նավթի գների անկումը կշարունակվեն, որոնք էլ ավելի կխորացնեն Ռուսաստանի ֆինանսատնտեսական ճգնաժամը։ Ըստ Գ.Մակարյանի` պատժամիջոցների կիրառման պատճառով վերջին շրջանում Ռուսաստանում չեղյալ են հայտարարվել մի շարք ներդրումային ծրագրեր, բազմաթիվ խոշոր ընկերություններ իրենց բիզնեսը դուրս են բերում Ռուսաստանից, ուստի Հայաստանը չպետք է անընդհատ Ռուսաստանի «պոչը բռնի», կամ` միայն այդ երկրի տնտեսությունից կանխատեսի իր ապագա զարգացումը:

«Մենք չպետք է Ռուսաստանի էկոնոմիկայով պայմանավորենք մեր էկոնոմիկան: Հայաստանը պետք է ինքնուրույն ռազմավարություն մշակի, որպեսզի ներկայացված լինի ինչպես եվրոպական, այնպես էլ արաբական երկրների շուկաներում: Այստեղ պետությունը մեծ անելիքներ ունի»,- ասաց Գ.Մակարյանը:

Մինչդեռ, ըստ նրա, զարգացող երկրների ռազմավարություններում Հայաստանի հետ համագործակցությունը նշված չէ, իսկ դա մեկ անգամ ևս խոսում է այն մասին, որ Կառավարությունը պետք է այնպիսի ծրագրեր մշակի, որպեսզի աշխարհի խոշորագույն պետությունները, որոնք մեծ ներդրումներ են կատարում այլ երկրներում, նաև ուշադրություն դարձնեն Հայաստանին:

«Այսինքն` մենք պետք է խոշոր պետությունների ուշադրությունը մեզ վրա սևեռենք, պետք է ճկուն լինենք, և եթե կախված լինենք միայն Ռուսաստանից, ապա տանուլ կտանք, քանի որ հայտնի չէ, թե Ռուսաստանում տիրող վիճակը որքան կշարունակվի»,- նշեց Գ.Մակարյանը` հավելելով, որ Հայաստանը պետք է կարողանա այլընտրանքային ուղիներ գտնել՝ դիմակայելու միջազգային փոփոխություններին:

Ինչ վերաբերում է Եվրասիական տնտեսական միությանը Հայաստանի անդամակցությունից հետո նոր հորիզոնների բացմանը, Գ. Մակարյանը կարծում է, որ Հայաստանի համար միանգամից նոր հորիզոններ չեն բացվի, քանի որ Բելառուսը և Ղազախստանը մեր երկրի համար լուրջ գործընկերներ չեն: Ըստ նրա` երկու պետությունների հետ Հայաստանի արտաքին առևտրի ծավալը քիչ տոկոս է կազմում. Բելառուսի հետ առևտուրը Հայաստանի արտաքին առևտրի կազմում 0,8 տոկոս է, իսկ Ղազախստանի հետ՝ 0,2 տոկոս:

«Մեզ համար ամենախոշոր առևտրային գործընկերը կրկին Ռուսաստանն է և տվյալ երկրի տնտեսությունն է լինելու թելադրողը: Այսինքն՝ Ռուսաստանի տնտեսական վիճակը երբեք չի կարելի անտեսել, սակայն, եթե Ռուսաստանը այս իրավիճակից դուրս չգա, ապա ԵՏՄ-ին անդամակցությունը ավելի շատ խնդիրներ կառաջացնի, քան` հնարավորություններ»,- ընդգծեց Գ.Մակարյանը:

Նրա խոսքերով` տեղական ընկերությունների ղեկավարների հետ զրույցները ցույց են տալիս, որ մեր գործարարները դեռ չեն շտապում իրենց արտադրանքը ԵՏՄ երկրներ արտահանել, քանի որ մեծ մասը Ամանորի նախաշեմին լուրջ կորուստներ է կրել` կապված ռուսական ռուբլու արժեզրկման հետ: Այսօր տեղական ընկերությունների պահեստներում բավարար քանակությամբ ապրանքներ կան, բայց նրանք չեն շտապում դուրս գալ ԵՏՄ շուկաներ. «Այստեղ Կառավարությունը պետք է քայլեր ձեռնարկի, կոմպենսացիաներ տրամադրի արտահանողներին»:

Նա միաժամանակ նշեց, որ այսօր խնդիրը նաև նրանում է կայանում, որ Բելառուսի և Ղազախստանի տնտեսությունները դեռ լավ ուսումնասիրված չեն, ինչը արտահանման տեսանկյունից նույնպես լուրջ խնդիրներ է առաջացնում:

«Ես չեմ պատկերացնում եմ, թե օրինակ Ղազախստան ինչպես ենք մեր արտադրանքը արտահանելու: Մենք պետք է հստակ դասակարգված ունենանք, թե որ պետության տնտեսությունը ինչի կարիք ունի և մենք ինչ ուղղությամբ կարող ենք արտահանում իրականացնել: Պետական ինստիտուտները պետք է արդեն այդ քարտեզն արդեն ունենային, արտահանողների ներկայացնեին, թե տվյալ երկրների համար որ ոլորտներն են մեզ համար թիրախային»,- նշեց Գ.Մակարյանը: