Դպրոցականների օլիմպիադայի օնլայն տարբերակին մասնակցելու համար Գեղարքունիքից հայտագրվել է 3400 աշակերտ

Գեղարքունիքի մարզում դպրոցականների առարկայական օլիմպիադայի մարզային փուլը մեկնարկում է այսօր: Գեղարքունիքի մարզպետարանի աշխատակազմի կրթության վարչության տեղեկացմամբ դպրոցականների առարկայական օլիմպիադայի մարզային փուլին կմասնակցեն դպրոցական և տարածքային փուլերն հաղթահարած աշակերտները:

Մարզային փուլը կմեկնարկի Գեղարքունիքի մարզի Մարտունու N2 հիմնական դպրոցում մաթեմատիկա առարկայից: Տարածքային փուլն անցկացվել է մարզի հինգ, իսկ դպրոցական փուլը` 123 դպրոցներում:

Չորս առարկաների` աստղագիտության, քիմիայի, կենսաբանության և ինֆորմատիկայի գծով Հանրապետությունում առաջին անգամ օլիմպիադան կանցկացվի օնլայն եղանակով, իսկ մաթեմատիկա և ֆիզիկա առարկաներից նույն եղանակով օլիմպիադան անցկացվում է արդեն երկրորդ անգամ:

Նշված 6 առարկաներից դպրոցականների օլիմպիադայի օնլայն տարբերակին մասնակցելու համար Գեղարքունիքի մարզից հայտագրվել է 3400 աշակերտ` մաթեմատիկա առարկայից 1681, ֆիզիկայից` 568, կենսաբանությունից` 480, քիմիայից` 383, ինֆորմատիկայից` 266 և աստղագիտությունից` 22 աշակերտ: