Տիգրան Ուրիխանյանի հայտարարությունից հետո, նրա անունը չեն ընդգրկել ԲՀԿ քարտուղարի թեկնածուների ցուցակում. «ՉԻ»

Առաջիկայում կլինի ԲՀԿ խմբակցության նիստ, որտեղ կընտրվի խմբակցության ղեկավարը և քարտուղարը: Բնականաբար, խմբակցությունը կղեկավարի Նաիրա Զոհրաբյանը, իսկ քարտուղարի դերում կուսակցությունն առաջ է քաշել մի քանի թեկնածուներ:

«Չորրորդ իշխանության» տեղեկությունների համաձայն՝ այդ պաշտոնում նախապես քննարկվել է պատգամավորներ Տիգրան Ուրիխանյանի, Վահան Բաբայանի ու Միքայել Մելքումյանի թեկնածությունը:

«Նկատենք, որ Տիգրան Ուրիխանյանը մամուլում կարծիք է հայտնել, որ եթե իրեն առաջարկեն լինել խմբակցության քարտուղար, ապա ինքը կհրաժարվի: Մեր տեղեկություններով՝ խմբակցությունը այդ հայտարարությունից հետո Ուրիխանյանի անունը չի ընդգրկել թեկնածուների ցուցակում և քարտուղար կընտրի կամ ԲՀԿ նորանշանական մամուլի քարտուղար Վահան Բաբայանին կամ էլ պատգամավոր Միքայել Մելքումյանին»,-հավելել է թերթը: