Ամենից շատ կարդացված նյութեր

16:15 12/03/2015

Արծվիկ Մինասյան. Սահմանադրական բարեփոխումների հայեցակարգի շուրջ գրեթե բոլոր կետերով կա փոխադարձ ընկալում

Հ.Յ. Դաշնակցության ներկայացուցիչները Սահմանադրական բարեփոխումների գործընթացի շրջանակներում հանդիպել են նախագահ Սերժ Սարգսյանի հետ, քննարկել սահմանադրական բարեփոխումների վերաբերյալ ՀՅԴ-ի ներկայացրած առաջարկները: Այս մասին Ազգային ժողովում լրագրողների հետ հանդիպմանը հայտնեց ԱԺ ՀՅԴ խմբակցության պատգամավոր Արծվիկ Մինասյանը:

Նա նշեց, որ այս պահի դրությամբ սահմանադրական բարեփոխումների հայեցակարգի շուրջ գրեթե բոլոր կետերով կա փոխադարձ ընկալում:

«Ավելին՝ մեր առաջարկությունները գրեթե ամբողջությամբ իրացման ենթակա են»,- ասաց ՀՅԴ-ական պատգամավորը` նշելով, որ իրենց առաջարկներին անդրադարձ կլինի, որովհետև դրանք հիմնավորված են:

Հիշեցնենք, ՀՅԴ-ն հանդես է եկել գնահատականներով ու առաջարկներով ՀՀ Սահմանադրական բարեփոխումների մասնագիտական հանձնաժողովի` 2014թ. հոկտեմբերին հրապարակված հայեցակարգ վերաբերյալ:

«Քաղաքական ուժերի հետ խորհրդակցություններից հետո նախագահը կհայտնի իր դիրքորոշումը սահմանադրական բարեփոխումների վերաբերյալ: Դրանից հետո արդեն պարզ կլինեն թե ժամկետները, թե սամանադրական փոփոխությունների բուն տեքստի մշակման փուլերը»,- ասաց Ա. Մինասյանը:

Պատգամանովրի դիտարկմամբ, լիակատար համաձայնություն կա այն առումով, որ Հայաստանում սահմանադրական բարեփոխումների անհրաժաշտություն կա. «Հայաստանում քաղաքական, տնտեսական, մարդու իրավունքների, տեղական ինքնակառավարման համակարգերում, անկախ դատական համակարգում, իշխանությունների թևերի հավասարակշռման և փոխադարձ զսպումների ոլորտում, ընդդիմություն-իշխանություն միասնական քաղաքական համակարգ ունենալու հարցում մեծամասամբ տեսակետները համընկնում են»:

Ըստ նրա, կենտրոնականն այստեղ կառավարման համակարգի փոփոխությունն է. «Այն, որ Հայաստանի խորհրդարանի հիմքը պետք է լինի 100 տոկոս համամասնական ընտրակարգը, առարկություն չկա»:

Ըստ նրա, սահմանադրական բարեփոխումներն երբեմն ներկայացվում են շատ պրիմիտիվ մակարդակում, սակայն իրականում դրանք խորքային բարեփոխումներ են, որոնց իրականացումից հետո Հայաստանի քաղաքացին զգալու է դրական փոփոխություններ:

Հիշեցնենք, որ այսօր սահմանադրական բարեփոխումների գործընթացի շրջանակներում նախագահ Սերժ Սարգսյանը հանդիպել է «Բարգավաճ Հայաստան», «Միավորված աշխատանքային» կուսակցությունների ներկայացուցիչների հետ: Հանդիպումների ընթացքում քննարկվել են սահմանադրական բարեփոխումներին առնչվող հարցեր:

Placeholder