Սևանի քաղաքապետը տեղափոխվել է հիվանդանոց

Սևանի քաղաքապետ Ռուդիկ Ղուկասյանի ինքնազգացողությունը կտրուկ վատացել է և նրան երեկ գիշերը տեղափոխել են «Էրեբունի» բժշկական կենտրոն: Panorama.am-ի թղթակցի հետ զրույցում բժշկական կենտրոնի մամլո խոսնակ Շուշան Հունանյանն ասաց, որ քաղաքապետի մոտ խնդիրներն առաջացել են սրտի շրջանում:

Նրա տեղեկացմամբ, քաղաքապետի սիրտը սնուցող անոթները մասնագետները ստենտավորել են և այժմ նրա վիճակը կայուն է:

Ղուկասյանը մի քանի օր կմնա «Էրեբունի»-ում, մասնագետների հսկողության ներքո: