Շրջակա միջավայրի օրն է. «Յոթ միլիարդ երազանք, մեկ մոլորակ, խնամքո՛վ սպառիր»

ՄԱԿ-ի Գլխավոր քարտուղար Պան Գի Մունն ուղերձ է հղել Շրջակա միջավայրի համաշխարհային օրվա առթիվ: ՄԱԿ-ի հայաստանյան գրասենյակի տարածած ուղերձում ասված է.

«Այս տարվա Շրջակա միջավայրի համաշխարհային օրվա թեման է` «Յոթ միլիարդ երազանք: Մեկ մոլորակ: Խնամքո՛վ սպառիր»:

Մարդկությունը շարունակում է սպառել շատ ավելի շատ բնական ռեսուրսներ, քան մոլորակը կարող է կայուն կերպով ապահովել: Երկրագնդի էկոհամակարգերից շատերը մոտենում են վճռորոշ բեկումնային կետերի: Ժամանակն է, որ փոխվենք:

Կայուն զարգացման նպատակը բոլոր մարդկանց կյանքի որակը բարձրացնելն է՝ առանց շրջակա միջավայրի վատթարացումը սաստկացնելու և առանց վտանգելու հետագա սերունդների` ռեսուրսներից օգտվելու կարողությունը: Մենք կարող ենք սա անել մեր սպառման կառուցվածքը փոխելու միջոցով՝ անցնելով այնպիսի ապրանքների օգտագործման, որոնց համար ավելի քիչ էներգիա, ջուր և այլ ռեսուրսներ են ծախսվում, ինչպես նաև ավելի քիչ սննդամթերք վատնելով:

Վերափոխման այս տարում, երբ հույս ունենք մեծ առաջընթացի ականատես լինել կայուն զարգացման և կլիմայի փոփոխության ասպարեզում, եկեք Շրջակա միջավայրի համաշխարհային օրը նշենք՝ ավելի լավ գիտակցելով մեր ազդեցությունը շրջակա միջավայրի վրա: Եկեք մտածե՛նք մեր կողմից կատարվող ընտրությունների բնապահպանական հետևանքների մասին: Եկե՛ք դառնանք մեր մոլորակի ավելի լավ տնտեսվարներ»: