Հայաստանում վերջին 10 տարիներին գրանցվել է մալարիայի 3 դեպք

Հայաստանը մալարիայից պաշտպանված երկիր է: Այս մասին Panorama.am-ի թղթակցի հետ զրույցում ասաց Հայաստանի գլխավոր վարակաբան Արա Ասոյանը:

Նրա խոսքերով՝ վերջին 10 տարիներին հանրապետությունում արձանագրվել են միայն Աֆրիկա մայրցամաքից բերովի եզակի դեպքեր:

«Ընդամենը 3 դեպք է գրանցվել, մեկը 2014թ-ի աշնանը՝ ռուս զբոսաշրջիկի մոտ, 2-ը՝ այս տարի: Երեք հիվանդներն էլ եկել են Աֆրիկայից»,- նշեց Ա.Ասոյանը:

Նշենք, որ հունիսի 10-ին Տանզանիայից Հայաստան ժամանած Ֆինլանդիայի քաղաքացու մոտ մալարիա է հայտնաբերվել:

Մասնագետները նրա վիճակը գնահատում են հիվանդությանը բնորոշ։ Կա լավացման միտում:

«Հիվանդությունը ժամանակին հայտնաբերվել է և բուժումը նորմալ է ընթանում»,- նշեց վարակաբանը:

Ա.Ասոյանը նաև հայտնեց, որ երեք օր առաջ հիվանդանոցից դուրս է գրվել մալարիայով վարակված ևս մեկ հիվանդ: Նա ՀՀ քաղաքացի է, և նույնպես Տանզանիայից էր Հայաստան եկել:

«Կարևորն այն է, որ բոլորն էլ բուժվում են, իսկ մինչ այդ արձանագրված դեպքերի հետևանքով մահ չի գրանցվել»,- ասաց նա:

Նշենք, որ 2006 թվականից ի վեր Հայաստանում տեղական մալարիայի դեպքեր չեն արձանագրվել: 2011 թվականին Առողջապահության համաշխարհային կազմակերպությունը Հայաստանի Հանրապետությունը վկայագրել է որպես մալարիայից ազատ տարածք:

Ա.Ասոյանի խոսքերով՝ հիվանդությունը փոխանցվում է անոֆելես (Anopheles) տեսակի մոծակների միջոցով, որոնցից Հայաստանում չկան:

«Այսինքն՝ հիվանդության հարուցիչները վարակված մարդկանցից առողջներին են անցնում անոֆելես ցեղին պատկանող մոծակների միջոցով: Փառք Աստծո, մեզ մոտ այդ մոծակներից չկան»,- նշեց Ա.Ասոյանը:

Նախորդիվ`
ԱՆ. Մալարիայով հիվանդի մոտ կա լավացման միտում

Տանզանիայից ՀՀ ժամանած ուղևորի մոտ հայտնաբերվել է մալարիա