ԼՂՀ Սահմանադրություն. Հողի նկատմամբ սեփականության իրավունք չունեն օտարերկրյա քաղաքացիները

Գերման Ստերլիգովը Լեռնային Ղարաբաղի Հանրապետությունում տնտեսական գործունեություն այս պահին չի իրականացնում, տնտեսական գործունեություն իրականացնելու հայտ չի ներկայացրել: Այս մասին Panorama.am-ին հայտնեց Արցախի Հանրապետության վարչապետի մամուլի խոսնակ Արտակ Բեգլարյանը:

Մաքսիմ Ալեքսանյանը, ով դեռ մի քանի օր առաջ ԼՂՀ-ի՝ այժմ կառուցվածքային փոփոխությունների փուլում գտնվող կադաստրի պետի պաշտոնակատարն էր, Panorama.am-ին տեղեկացրեց, որ ինքը տվյալներ չունի Ստերլիգովի կողմից հողատարածք գնելու կամ վարձակալելու մասին:

Ավելի վաղ Արցախի ԱԳՆ-ից Panorama.am-ին հայտնել էին, որ ռուս գործարարը Արցախ այցելելիս ԼՂՀ Արտգործնախարարության հյուպատոսական բաժնում գրանցվել է որպես զբոսաշրջիկ:

Ստերլիգովը առայժմ պաշտոնական մեկնաբանություն չի տվել, «Վկոնտակտե» սոցիալական ցանցի իր էջում գրել է, որ սարերից իջել է, բացել ինտերնետը ու զարմացել. «Հայտարարում եմ մամլո ասուլիս առաջիկա երկուշաբթի: Վայրը` Լեռնային Ղարաբաղ, հին հայկական Շուշի քաղաք, կեսօրին, հասցեն` Ղազանչեցոց 58»:

Արտակ Բեգլարյանը տեղեկացրեց, որ ԼՂՀ Սահմանադրության 33 հոդվածի 5-րդ կետն արգելում է օտարերկրացիներին Արցախում սեփականության իրավունքով հող գնել: Արցախի մայր օրենքը սահմանում է. «Հողի նկատմամբ սեփականության իրավունք չունեն օտարերկրյա քաղաքացիները և քաղաքացիություն չունեցող անձինք, բացառությամբ օրենքով նախատեսված դեպքերի»:

Բացառությունները սահմանում է ԼՂՀ հողային օրենսգրքի  64-րդ հոդվածը: Օրինակ, այդ հոդվածի առաջին կետը սահմանում է.
1. Պետության և համայնքների սեփականության հողամասերը սեփականության իրավունքով անհատույց տրամադրվում են գյուղատնտեսական գործունեության համար և որպես տնամերձ կամ անհատական բնակելի տան կառուցման և սպասարկման համար`
1/ պատերազմական գործողություններից տուժած, նոր բնակեցվող, ծայրամասային և լքված բնակավայրերում /ցանկը հաստատում է կառավարությունը/ այն ընտանիքներին, որոնք նախկինում չեն օգտվել հողի սեփականաշնորհումից, չեն ստացել /ձեռք բերել/ տնամերձ կամ բնակելի տան շինարարության և դրա սպասարկման համար հողամասեր.
2/ Լեռնային Ղարաբաղի Հանրապետությունում բնակվող այն ընտանիքներին, որոնք ցանկություն են հայտնում մշտական բնակություն հաստատել սույն հոդվածի 1-ին կետի 1-ին ենթակետում նշված բնակավայրերում:

Օրենքով նաև սահմանվում է, որ գյուղատնտեսական գործունեության համար անհատույց տրամադրված հողամասերի օգտագործումն այլ նպատակներով արգելվում է:

Ի դեպ, վարչապետի մամուլի խոսնակն ասաց, որ Արցախում տնտեսական գործունեություն ծավալող օտարերկրացիներ շատ կան, նրանք հիմնականում ներգրավված են զբոսաշրջության, հանքարդյունաբերության ու էներգետիկ ոլորտներում: Բացի օտարերկրացի հանդիսացող հայերից այդ ոլորտներում գործունեություն ծավալող ընկերությունների բաժնետերեր են նաև օտարերկրացի այլազգիներ:

Ստերլիգովի վերաբերյալ այլ հրապարակումներ՝
Լեռնային Ղարաբաղը հրաշք երկիր է, որտեղ ագրեսիա չկա, որտեղ ժողովուրդը բարի է. Գերման Ստերլիգով
Ռուս մեծահարուստը Արցախ է այցելել որպես զբոսաշրջիկ
Ռուս գործարարը լքել է Ռուսաստանը և հաստատվել Լեռնային Ղարաբաղում
Ստերլիգովի կինը Արցախում նորաձևության կենտրոն կբացի (տեսանյութ)