Շիմով. Ստեղծված իրավիճակում արտաքին ուժերին ձեռնտու չէ ԼՂ հակամարտության գոտում իրավիճակի սրացումը

Ստեղծված իրավիճակում արտաքին ուժերին ձեռնտու չէ ԼՂ հակամարտության գոտում իրավիճակի սրացումը: «Ռեգիոն» հետազոտական կենտրոնի կազմակերպած առցանց հարցազրույցի ժամանակ երեկ նման տեսակետ է հայտնել չեխ լրագրող, պատմաբան, «Ազատություն ռադիոկայանի» ռուսական ծառայության միջազգային մեկնաբան Յարոսլավ Շիմովը:

«Այս պահին ես չեմ տեսնում այն խոշոր արտաքին ուժերին, ովքեր շահագրգռված կլինեին Ղարաբաղում իրավիճակի «ապասառեցման» մեջ: Ռուսաստանը ներքաշված է Արևմուտքի հետ հակամարտության մեջ: Թուրքիան, իր հերթին, ունի բավական շատ ներքին խնդիրներ»,- նշել է Յարոսլավ Շիմովը:

Դրա հետ մեկտեղ, ըստ բանախոսի` Թուրքիայի սահմանների մոտ ստեղծվել է իրապես վտագավոր լարվածության օջախ` հանձինս «Իսլամական պետության»:

«Այս պայմաններում դժվար թե ինչ-որ մեկի համար ձեռնտու լինի «քչփորել» հին վերքերը»,- հավելել է Յարոսլավ Շիմովը:

Վերջինիս կարծիքով` այս պահին հետխորհրդային տարածքում միակ «չսառեցված» հակամարտությունը Ուկրաինայի արևելքում ստեղծված իրավիճակն է:

Յարոսլավ Շիմովի խոսքերով` հենց Ուկրաինայում հարատև խաղաղության հաստատման հնարավորություններից են կախված հետխորհրդային տարածքում առկա մյուս հակամարտություններում հնարավոր զարգացումները: