ՀՀ Նախագահի մրցանակի համար կմրցեն նաև Հայաստանի նախակրթական հաստատությունները և հաշմանդամ մարզիկները

ՀՀ կառավարությունը հուլիսի 30-ի նիստում հավանություն է տվել ՀՀ սպորտի և երիտասարդության հարցերի նախարար Գաբրիել Ղազարյանի ներկայացրած «Հայաստանի Հանրապետության 2015 թվականի պետական բյուջեում վերաբաշխում, Հայաստանի Հանրապետության կառավարության 2014 թվականի դեկտեմբերի 18-ի N 1515-Ն որոշման մեջ փոփոխություններ, լրացումներ կատարելու և Հայաստանի Հանրապետության սպորտի և երիտասարդության հարցերի նախարարությանը գումար հատկացնելու մասին» Հայաստանի Հանրապետության կառավարության որոշման նախագծին: Այս մասին հայտնում է ՀՀ սպորտի և երիտասարդության հարցերի նախարարության պաշտոնական կայքը:

ՀՀ Նախագահի մրցանակի համար անցկացվող «Լավագույն մարզական ընտանիք» ամենամյա մրցաշարին կավելանան ևս երկու ստուգատեսներ, որտեղ իրենց ուժերը կչափեն Հայաստանի Հանրապետության և Լեռնային Ղարաբաղի Հանրապետության նախակրթական հաստատությունների շուրջ 5500 սաներ և 220 հաշմանդամություն ունեցող մարզիկներ:

Ինչպես նշել է նախարար Ղազարյանը, այս մրցաշարերի կազմակերպումը իրականացվելու է առանց լրացուցիչ պետական ֆինանսավորման` ընդամենը վերաբաշխում կատարելով «Լավագույն մարզական ընտանիք» մրցույթի ծրագրով հատկացված գումարները:

Ծրագիրը կնպաստի հաշմանդամություն ունեցող անձանց՝ սպորտի նկատմամբ վերաբերմունքի ձևավորմանը, սպորտի միջոցով նրանց առողջության ամրապնդմանը, ակտիվ հանգստի կազմակերպմանը, ինչպես նաև նախադպրոցական տարիքի երեխաների առողջության ամրապնդմանն ու առողջ ապրելակերպի արմատավորմանը։