Սուրիկ Խաչատրյանի մահափորձի գործով դատավարական գործողությունները մեկը մյուսից անօրինական են. Փաստաբան

Սյունիքի մարզպետ Սուրիկ Խաչատրյանի դեմ մահափորձի գործով մեղադրյալ Հենրիկ Ավագյանի կալանքի դեմ բողոքարկումն արդյունքներ չի տվել. հուլիսի 30-ին Վերաքննիչ դատարանը մերժել է Ավագյանի փաստաբանների բողոքը: Մինչդեռ, փաստաբան Մարինե Ֆարմանյանի խոսքով, բողոքում իրենք մատնանշել էին բազմաթիվ ապացույցներ, որոնք ցույց են տալիս, որ նախաքննությունն իրականացնող ԱԱԾ քննչական վարչությունը անօրինական քննչական գործողություններ է կատարել:

«Գործով մեղադրյալներից ոչ մեկը մյուսի հետ կապ չունի: Ոչ մեկ մյուսի հետ չի համագործակցել, առավել ևս` կազմակերպել: Քննչական, դատավարական գործողությունները մեկը մյուսից անօրինական են», -Panorama.am-ի թղթակցի հետ զրույցում ասաց փաստաբանը:

Հիշեցնենք` գործով մեղադրյալներ են Արա Բուդաղյանը, Գարեն Աթաջանյանը, Վիտալի Մինասյանը և Հենրիկ Ավագյանը: Վերջինի մեղադրանքը ծանր է, քանի որ ըստ նախաքննություն իրականացնող մարմնի, Ավագյանը մահափորձ կատարող անձն է, իսկ մյուս երկուսը` օժանդակող, իսկ Արա Բուդաղյանը` դրդող:

Մեղադրյալներին կալանավորելու մասին միջնորդության հիմքում ԱԱԾ քննչական վարչությունը դրել էր նրանց միջև գաղտնալսված հեռախոսազրույցները: Սակայն փաստաբանները, մասնավորապես Արա Բուդաղյանի և Հենրիկ Ավագյանի պաշտպանները, հայտարարում են, որ նրանց միջև հեռախոսազրույցում գումարային խոսակցությունները զուտ անձնական բնույթ են կրում: Հայկ Ալումյանը օրերս ասուլիսում ասել էր, որ Վիտալի Մինասյանը մոր 60-ամյակի կապակցությամբ Արա Բուդաղյանից 200 հազար դրամ է պարտքով վերցրել, մի մասը վերադարձրել է և զանգահարել է Արա Բուդաղյանին՝ տեղեկացնելու, որ մյուս մասը չի կարողանում վերադարձնել:

Իսկ ահա Հենրիկ Ավագյանի ու Գարեն Աթաջանյանի միջև հեռախոսային խոսակցությունը, փաստաբան Ֆարմանյանի
ներկայացմամբ, վերաբերում է բիզնես ծրագրին:

«Գարենի ու Հենրիկի խոսակցությունը բացառապես վերաբերում է բիզնեսին, այսինքն` մարդիկ ինչ-որ բան են ուզում ինչ-որ մեկի վաճառել և մի փոքր ավել գումար աշխատել: Մահափորձի ու դրա պատվերի մասին խոսք չկա: Եթե շատ ուզենք, նման միտք գաղտնալսումներից չենք կարող քաղել», -հավելեց Մարինե Ֆարմանյանը:

Վերաքննիչ բողոքում փաստաբաններ Սյուզաննա Խչեյանի և Մարինե Ֆարմանյանի կողմից նշված մյուս խախտումը վերաբերել է Հենրիկ Ավագյանի բնակարանի խուզարկությանը: Նախ` բնակարանը, որը խուզարկել են, Հենրիկ Ավագյանինը չի եղել, և բացի այդ, խուզարկության ժամանակ, որպես ընթերակա, ներկա են գտնվել այնպիսի մարդիկ, ովքեր Ավագյանի հետ հակամարտության մեջ գտնվող անձի բարեկամներ են, հետևաբար կարող են լինել ոչ օբյեկտիվ:

«Սյունիք գյուղի գյուղապետի հետ Հենրիկ Ավագյանը մի շարք քաղաքացիական, վարչական և քրեական գործերով դատական վեճերի մեջ է, ունի անգամ շահած գործեր, իսկ խուզարկությանը ներկա գտնված անձինք եղել են այդ գյուղապետի աղջկա ամուսինը և եղբորորդին, ով աշխատում է գյուղապետարանում և քաջատեղյակ է այդ դատական գործընթացից: Մինչդեռ ընթերակա կարող է լինել քրեական գործով չշահագրգռված ՀՀ չափահաս քաղաքացին», -հավելեց Ֆարմանյանը:

Բացի այդ, խուզարկությունը կատարվել է Հենրիկ Ավագյանի մոր տանը, իսկ մայրը` Զաբելա Կինոսյանը, փաստաբանի ներկայացմամբ, տառապում է աթերոսկլերոզով, տեղանքում կողմնորոշվելու խանգարումներ ունի, կատարակտայի շատ բարձր աստիճան, ինչը հաստատվում է բժշկական տեղեկանքով: Այսինքն` նա չունի բավարար տեսողություն և հիվանդության պատճառով չի կարող ճիշտ հասկանալ և գնահատել շրջապատում կատարվող իրադարձությունները, ու, ըստ փաստաբանի, ա յդքանով հանդերձ, Ավագյանի մոր տանը խուզարկության ու դրա արդյունքում հայտնաբերված ինքնաձիգի մասին արձանագրություն են տվել ստորագրելու:

«Այդ կինը չէր կարող հասկանալ քննչական գործողությունների իմաստն ու հետևանքները: Միգուցե նրան ուրիշ բան են ցույց տվել, ուրիշ բան արձանագրել: Ուստի այդ պայմաններում շատ կասկածելի է, որ հենց այնտեղից է հայտնաբերվել, ըստ նախաքննական մարմնի, սպանության գործիք հանդիսացող ինքնաձիգը», -նկատեց մեր զրուցակիցը:

Ինչ վերաբերում է այն տեղեկություններին, թե Հենրիկ Ավագյանի տանը փամփուշտներ են հայտնաբերվել, Մարինե Ֆարմանյանը հայտարարեց. «Եթե նույնիսկ եղել են այդ փամփուշտները , ապա Սյունիքում ո՞ր ազատամարտիկը փամփուշտ չունի: Այդ լեռներում էլ ինչպե՞ս պայքարեն թշնամու դեմ և ի՞նչպես դիմագրավեն: Բայց դա դեռ չի նշանակում, որ դրանք վերցրել, ինքնաձիգը լցրել ու դրանով մահափորձ է կատարել»:

Պաշտպանական կողմի վերաքննիչ բողոքում ներկայացված այս ու այլ խախտումներ Վերաքննիչ դատարանը հաշվի չի առել, և փաստաբանի խոսքով, դատավորն ասել է, թե դրանք լավ կլինի ներկայացվեն հիմնական դատավարության ժամանակ:

Ինչևէ, վերլուծելով ձեռքի տակ եղած փաստերը, փաստաբանը եզրահանգել է. «Հենրիկ Ավագյանը գտնվել է որոշ մարդկանց թիրախում»:

Պաշտպանական կողմն այս պահին քննարկում է վերաքննիչ քրեական դատարանի որոշման դեմ վճռաբեկ բողոք բերելու հարցերը:

Հարակից հրապարակում`
Սուրիկ Խաչատրյանի մահափորձի գործով դեռ շատ խաղաքարտեր կբացվեն. Փաստաբան