«Սահմանադրական փոփոխությունների նախագիծը չի կարող ստանալ ժողովրդավարացմանը խոչընդոտող որակում»

Հայաստանի սահմանադրական փոփոխությունների նախագծում կան կետեր, որոնք դրական են գնահատվում, կան նաև կետեր, որոնք էական փոփոխությունների կարիք ունեն: Լրագրողների հետ հանդիպման ժամանակ ասաց Վենետիկի հանձնաժողովի անդամ Քրիստոֆ Գրաբենվարթերը:

Պատասխանելով հարցին, թե արդյո՞ք նոր սահմանադրությունը երաշխավորում է, որ Հայաստանում ժողովրդավարությունը նոր մակարդակի վրա է լինելու, ասաց. «Մենք որպես փորձագետներ չենք կարող երաշխավորել ամբողջ գործընթացը, չենք կարող սերտեֆիկատ տալ, որ երկու տարի հետո ժողովրդավարությունն ավելի լավ կլինի, թե ոչ: Կարող ենք նայել տեքստին, ենթատեքստին, գնահատել, ինչքանով է այն համապատասախանում եվրոպական չափանաիշներին, արդյոք համահունչ է լավագույն պրակտիկային, որ գոյություն ունի»:

Նաև ավելացրեց, Վենետիկի հանձնաժողովը, երբ մասնակցում է նախագծերի քննարկումների, որևէ կերպ չի օրինականացնում նոր մի կարգ:

«Ինչ մենք ցանկանում ենք ասել այն է, որ Սահմանադրությունը ուղղորդում է մեզ դեպի ժողովրդավարական գործընթացներ և այն, ինչ մենք այսօր ունենք, չենք կարող ասել, որ չի համապատասխանում ժողովրդավարության չափանիշներին»,-ասաց փորձագետը` միաժամանակ նշելով, որ ներկայացված սահմանադրական փոփոխությունների նախագիծը չի կարող ստանալ ժողովրդավարացմանը խոչընդոտող որակում:

Եվրոպացի փորձագետն ասաց, որ փոփոխությունների վերջնական տարբերակի վերաբերյալ Վենետիկի հանձնաժողովը կտա իր եզրակացությունը հոկտեմբերի վերջին. «Մեր այս այցի ընթացքում մենք հավաքում ենք բոլոր տպավորությունները, նոր տեղեկություններ ենք ստանում, որը ներկայացվելու է մեր նոր փաստաթղում»:

Մինչ այդ՝ սեպտեմբերի կեսերին, կլինի նախավերջին գնահատականը: Վենետիկի հանձնաժողովի վերջնական գնահատականը ընդունվելու է հանձնաժողովի նիստում հոկտեմբերի 26-28-ին: