«Մառազմատիկ հայտարարություն է». ՍԴ նախագահը՝ Լևոն Զուրաբյանին. News.am

Հայտարարությունները, թե հայկական կողմը կաշառել է Վենետիկի հանձնաժողովի նախագահին՝ դրական եզրակացություն ստանալու համար, մառազմատիկ երևույթ են: Այս մասին NEWS.am-ի թղթակցի հետ զրույցում ասել է Սահմանադրական դատարանի նախագահ Գագիկ Հարությունյանը:

«Այդ հայտարարությունը ես համարում եմ բացարձակ մառազմատիկ երևույթ: Կարծում եմ, որ այս հարցերն իրավական հարթության վրա կքննարկվեն: Ամենամեծ կաշառքն այն է, որ մենք ներկայացրել ենք այդքան փայլուն նախագիծ, և դրա վերաբերյալ տրվել է այդպիսի կարծիք: Իսկ մնացածը ես հիվանդագին երեւակայության արդյունք եմ համարում, և ամենայն հավանականությամբ, դրանք իրավական գործընթացներ կմտնեն եւ կպարզվի, թե ինչու համար են նման բաներ արվում»,-նշել է Գագիկ Հարությունյանը:

Հարցին՝ հնարավոր է հայց ներկայացնեն, ՍԴ նախագահը պատասխանել է. «Խոսքը հայցի մասին չէ, իրավապահ մարմինները պարտավոր են նման դեպքում ձեռնարկել անհրաժեշտ քայլեր»:

Աղբյուրը հիշեցնում է, որ հոկտեմբերի 9-ին խորհրդարանում կայացած ճեպազրույցում ՀԱԿ խմբակցության ղեկավար Լևոն Զուրաբյանը հայտարարել էր, թե Հայաստանի հասարակությունը չի աջակցում սահմանադրական փոփոխություններին:

«Սահմանադրական փոփոխությունների կողմնակիցները շատ նեղ շրջանակ են. ՀՀԿ-ն՝ Սերժ Սարգսյանի գլխավորությամբ, իր կողմց ստեղծված սահմանադրական հանձնաժողովը՝ Գագիկ Հարությունյանի գլխավորությամբ, որի միակ գործը եղել է կաշառել Վենետիկի հանձնաժողովին (ինքը զբաղվել է այնտեղ լոբբինգով, և մենք փաստեր էլ ունենք)»,- ասել էր Զուրաբյանը:

Նախորդող հրապարակում՝
Իշխանությունն ամեն ինչ պետք է անի, որ հանրաքվեն անցնի ամենաբարձր մակարդակով. Վահրամ Բաղդասարյան