Վերանորոգումից հետո կունենանք մայր թատրոնին հարիր բեմահարթակ. Ա. Էլբակյան

Գաբրիել Սունդուկյանի անվան ազգային ակադեմիական թատրոնի դռները մի քանի ամիս փակ կլինեն. մայր թատրոնում սկսվել են վերանորոգման աշխատանքները:

Թատրոնի գեղարվեստական ղեկավար, ՀՀ արվեստի վաստակավոր գործիչ Արմեն Էլբակյանը Panorama.am-ի հետ զրույցում ասաց, որ վերանորոգվելու է բեմը, նստարանները, հատակը, տեղադրվելու է ձայնային, լուսային նոր տեխնիկա: Ըստ նրա, նախատեված է վեց ամսում ավարտել աշխատանքները, բայց վերջնաժամկետը չէ, քանի որ կողքից այլ աշխատանքներ էլ կան անելու: Վերանորոգման աշխատանքները կատարում են ավստրիացիները:

Մինչ թատրոնում ընթանում են վերանորոգման աշխատանքներ, այդ ընթացքում թատրոնի ներկայացումները կկայանան Հակոբ Պարոնյանի անվան երաժշտական կոմեդիայի թատրոնում: Ա. Էլբակյանն ասաց, որ ամիսը չորս ներկայացումով հանդես են գալու Հակոբ Պարոնյանի անվան երաժշտական կոմեդիայի թատրոնում: Միաժամանակ, ըստ նրա, աշխատելու են նոր ներկայացումների վրա, ինչպես նաև արդեն խաղացանկում եղած ներկայացումները համապատասխանեցնելու են բեմի նոր հնարավորություններին:

«Վերանորոգման աշխատանքներից հետո, եթե ամեն ինչ ըստ ծրագրվածի լինի, կունենանք ժամանակակից թատրոններին համապատասխան հնարավորություններ, մայր թատրոնին հարիր բեմահարթակ»,- նշեց թատրոնի գեղարվեստական ղեկավարը:

Հիշեցնենք, որ նախորդ տարվա նոյեմբերին կառավարությունը որոշում էր ընդունել արտոնյալ պայմաններով 7 միլիոն եվրոյի վարկ վերցնել ավստրիական «Էրստե» բանկից՝ Գաբրիել Սունդուկյանի անվան ազգային ակադեմիական թատրոնը վերանորոգելու համար: ՀՀ մշակույթի նախարարության և ավստրիական Վաագներ-Բիրո կոնսորցիումի միջև նախատեսվում էր կնքել 7 մլն եվրոյի ապրանքի և ծառայության մատուցման պայմանագիր 23 տարի մարման ժամկետով: