Կրկնակի քվեարկելու հավանականությունը զրոյի է հավասարեցված. Մ. Մինասյան

«Ստեղծվել են տարածքային և համայնքային շտաբեր, փորձելու ենք հանրությանը տեղեկացնել «այո»-ի առավելությունների մասին, սահմանադրական փոփոխությունների իմաստը»,-լրագրողների հետ հանդիպմանն ասաց ԱԺ Հանրապետական խմբակցության պատգամավոր Մկրտիչ Մինասյանը՝ ներկայացնելով սահմանադրության հարաքվեի քարոզարշավի ընթացքը:

Նույնը, սակայն բացասական իմաստով, ներկայացնելու են «ոչ»-ի քարոզիչները,-ասաց պատգամավորը:

«Ժողովրդին պետք է բացեիբաց ներկայացնել, թե ինչ է իրենից ներկայացնում սահմանադրական բարեփոխումները, ինչպիսի հնարավորություն է ստեղծվում հանրության և իշխանության միջև հետադարձ կապն ամրապնդելու ուղղությամբ»,-նշեց Մինասյանը՝ շեշտելով, որ հնարավորություն է ստեղծվում համագործակցել ընդդիմադիր դաշտի հետ:

Անդրադառնալով հանրաքվեի թափանցիկությանն և կրկնակի քվեարկությունների հավանականությանը՝ նա ասաց. «Գտնում եմ, որ կեղծելու և կրկնակի քվեարկելու հավանականությունը զրոյի է հավասարեցված: Մեզ անհրաժեշտ է թափանցիկ և վստահություն ներշնչող հանրաքվե»:

Պատգամավորը հավելեց, որ հանձնաժողովների և վստահված անձանց մեծամասնությունը ընդդիմությունից է: