Լեյլա Յունուսի պատիժը փոխարինվել է «պայմանականով»

Բաքվի բողոքարկման դատարնն այսօր մեղմացրել է ամուսիններ Լեյլա և Արիֆ Յունուսների նկատմամբ դատավճիռը, ովքեր դատապարտված են համապատասխանաբար 8 և 7,5 տարվա ազատազրկման: Այս մասին հաղորդում է ադրբեջանական «Contact.az» լրատվականը: 

Բողոքարկման դատարանը դատապարտյալների ազատազրկման իրական ժամկետները փոխարինել է պայմանականով` սահմանելով 5 տարի փորձաշրջան: Ընդ որում` Լեյլա Յունուսը ազատ է արձակվել հենց դատարանի շենքից:

Նշենք, որ Լեյլա Յունուսի ամուսինը` Արիֆ Յունուսն, արդեն ազատության մեջ է նոյեմբերի 12-ից, երբ դատարանը նրա նկատմամբ խափանման միջոցը փոխարինեց ստորագրությամբ երկիրը չլքելու պայմանով:

Խաղաղության և ժողովրդավարության ինստիտուտի տնօրեն Լեյլա Յունուսը և նրա ամուսինը` Արիֆ Յունուսը ձերբակալվել էին 2014թ-ի ամռանը և այս տարվա օգոստոսին դատապարտվել էին ազատազրկման տնտեսական մեքենայությունների մեղադրանքով: