Նարեկ Հախնազարյանը, Հայկ Կազազյանը, Աստղիկ Սիրանոսյանը՝ ՀՊԵՆ-ի 10-ամյակին նվիրված հոբելյանական համերգին

Հայաստանի պետական երիտասարդական նվագախմբի 10-ամյակին նվիրված հոբելյանական համերգին մասնակցելու են Չայկովսկու անվան մրցույթի ոսկե մեդալակիր թավջութակահար Նարեկ Հախնազարյանը, ուկրաինացի դաշնակահար Ալեքսանդր Ռոմանովսկին, ջութակահար Հայկ Կազազյանը (Ռուսաստան /Հայաստան), իտալացի ակորդեոնահար և բանդոնեոնահար Մարիո Ստեֆանո Պիետրոդարկին, ճապոնացի ջութակահարուհի Յուկա Ցուբոյը,  թավջութակահարուհի Աստղիկ Սիրանոսյանը (Ֆրանսիա): Այս մասին Panorama.am-ին տեղեկացրեցին նվագախմբի մամուլի ծառայությունից: 

Համերգը ղեկավարելու են դիրիժորներ Քշիշտոֆ Պենդերեցկին (Լեհաստան) և Սերգեյ Սմբատյանը:

Հիշեցնենք, որ համերգը տեղի կունենա Արամ Խաչատրյան համերգասրահում հունվարի 25-ին:

2005թ-ին Սերգեյ Սմբատյանը հիմնել և մինչ օրս ղեկավարում է Հայաստանի երիտասարդական նվագախումբը` որպես գեղարվեստական ղեկավար և գլխավոր դիրիժոր: Նվագախմբում ընդգրկված են Երևանի Կոմիտասի անվան պետական կոնսերվատորիայի ուսանողներ: Մեկ տարի անց Հայաստանի երիտասարդական նվագախումբը դարձել է Արամ Խաչատրյանի անվան միջազգային մրցույթի պաշտոնական նվագախումբն, իսկ 2008թ-ին ՀՀ կառավարության որոշմամբ ստանձնել է «պետական կարգավիճակ»` բարձր վարպետության և ժամանակակից երաժշտական միտումների խորն ընկալման համար: