«Անխիղճներ, անսովեստներ». Պերմյակովի մեղադրանքի ընթերցանությունը հուզեց Ավետիսյանների հարազատներին

Այսօր Գյումրիի ռուսական ռազմաբազայում ընթացող Պերմյակովի գործով դատական նիստում Շիրակի մարզի ընդհանուր իրավասության դատարանի դատավոր Հարություն Մովսեսյանը հայտարարեց դատաքննության մեկնարկի մասին:

Դրանից հետո Պերմյակովի մեղադրանքը պաշտպանող դատախազը ընթերցեց մեղադրական եզրակացության տեքստը. «2015թ. հունվարի 12-ին ՀՀ Գյումրի քաղաքում տեղակայված ՌԴ 102-րդ ռազմաբազայի թիվ 04436 զորամասի տանկային գումարտակի 1-ին տանկային վաշտի ժամկետային զինծառայող Վալերի Պերմյակովը իրեն ամրակցված ԱԿՍ-74 տեսակի,1283689 համարի ինքնաձիգով, 5,45 մմ տրամաչափի 60 փամփուշտով և 689 համարի սվին դանակով «Մալայա կրեպոստ» կոչվող տարածքում իրականացնելով պահակային ծառայություն, ժամը 02-ի սահմաններում ինքնակամ լքել է պահակակետը և հագուստներ, գումար հայթայթելու նպատակով շրջել է Գյումրի քաղաքում:

Ժամը 06-ի սահմաններում հասնելով Գյումրի քաղաքի Մյասնիկյան փողոցի 188-րդ հասցեի տան մոտ` զենքի գործադրմամբ ավազակային հարձակման եղանակով, ուրիշի գույքը հափշտակելու դիտավորությամբ դարպասի բաց դռնակից մտել է բակ, մոտեցել տանը, սվին դանակով մուտքի դռան ապակին հանելու և ներսի կողմից փականի վրա մնացած բանալիով դուռը բացելու միջոցով ապօրինի մուտք է գործել նշված տուն, որտեղ երկու և ավելի անձանց ապօրինաբար կյանքից զրկելու դիտավորությամբ իր մոտ եղած ԱԿՍ-74 տեսակի, 1283689 համարի ինքնաձիգից ուղիղ նշանառությամբ արձակած 28 կրակոցով տեղում սպանել է նույն տան բնակիչներ Աիդա Ավետիսյանին, Հասմիկ Ավետիսյանին, Սերյոժա Ավետիսյանին, Արմեն Ավետիսյանին, Արաքսյա Պողոսյանին և մանկահասակ Հասմիկ Ավետիսյանին, որից հետո մանկահասակ Սերյոժա Ավետիսյանին առանձին դաժանությամբ սպանելու դիտավորությամբ, այն է` ունենալով երկու փամփուշտով լիցքավորված ինքնաձիգ և երեսուն փամփուշտով լիցքավորված պահեստային պահունակ, վերը նկարագրված եղանակով հանցավոր մտադրությունն ավարտին հասցնելու փոխարեն, ինքնաձիգին ամրացված սվին-դանակով հինգ հարված է հասցրել մոր գրկում անօգնական վիճակում գտնվող վեց ամսական Սերյոժա Ավետիսյանի մարմնի կենսական կարևոր օրգանների` կրծքավանդակի ձախ կեսի, որովայնի, ինչպես նաև ձախ բազկի շրջաններում` պատճառելով կտրած-ծակած թափանցող և չթափանցող վերքեր,որոնց հետևանոքով մանկահասակ Սերյոժա Ավետիսյանը հիվանդանոցում յոթ օր անց մահացել է»:

Այս մանրամասները հուզմունք առաջացրին դատական նիստերի դահլիճում, և Ավետիսյանների հարզատներից մեկը բացականչեց. «Դե հիմա պաշտպանեք էս ստոր արարածին, անխիղճներ, անսովեստներ»:

Շարունակելով ներկայացնել Պերմյակովի մեղադրանքը, դատախազը հայտնեց նաև, որ Պերմյակովը Ավետիսյանների տնից հափշտակել է 64. 300 դրամ արժողությամբ  սպարտային գլխարկ, տաբատ, բաճկոն, մեկ զույգ կիսաճտքավոր կոշիկ բջջային հեռախոսներ և 6000 ՀՀ դրամ կանխիկ գումար ու հեռացել դեպքի վայրից:

Այնուհետև, դատախազի ներկայացմամբ, Պերմյակովը, փորձել է հատել Հայաստանի սահմանը և դուրս գալով Գյումրիի վարչական տարածքից հասել է ՀՀ-ում ՌԴ անվտանգության դաշնային ծառայության սահմանապահ վարչության` Բայանդուրի ուղեկալի սպասարկած ՀՀ պահպանվող պետական սահմանի հատված, ուսումնասիրել տեղանքը վերադարձել` պլանավորելով առավել անվտանգ իրադրությունում ` գիշերը, ապօրինի հատել սահմանը:

«Հանցավոր մտադրությունն իրականացնելու նպատակով Վալերի Պերկյակովը, չունենալով սահման հատելու իրավունք վերապահող սահմանված փաստաթղթեր և պատշաճ թույլտվություն, նույն օրը` ժամը 24-ի սահմաններում, փորձել է ապօրինի հատել ՀՀ պահպանվող պետական սահմանի Բայանդուրի 12-րդ ուղեկալի 1-ին տեղամասի հատվածը, սակայն հանցագործությունն ավարտին չի հասցրել, քանի որ 2015թ. հունվարի 13-ին` ժամը 00:12-ին, բռնվել է Բայանդուրի ուղեկալի ծառայողների կողմից», -ներկայացրեց դատախազը:

Դատախազի ելույթից հետո, դատավոր Մովսեսյանը ամբաստանյալ Պերմյակովից հետաքրքրվեց` իրեն հասկանալի՞ է առաջադրված մեղադրանքի էությունը, ինչին Պերմյակովը դրական պատասխան տվեց:

«Դուք Ձեզ մեղավոր ճանաչո՞ւմ եք»,-Պերմյակովին ուղղված դատավորի հաջորդ հարցն էր:

«Այո»,-կարճ պատասխանեց ամբաստանյալը:

«Թաղեմ քեզ», -հնչեց դահլիճից:

Դատավորը փորձեց ավելի մանրամասնել. «Կոնկրետ ինչում եք ձեզ մեղավոր ճանաչում»:

«Ամեն ինչում», -արձագանքեց Պերմյակովը:

«Ասա սպանության, թաղեմ ազիզ կյանքդ», -դահլիճից փորձեցին հուշել Պերմյակովին:

Դատավորը խնդրեց հարազատներին հանգստանալ, քանի որ ինքը հարցեր է տալիս ամբաստանյալին: