Գնումների ժամանակ հայ տղամա՞րդն է որոշում կայացնողը, թե՞ կինը. Հետազոտություն

Հայաստանում ինչպես կանայք, այնպես էլ տղամարդիկ հակված են գնումների վերաբերյալ որոշումների կայացման գործում իրենց դերն ավելի կարևորել: Նման եզրակացության են եկել «Հայաստանի գենդերային բարոմետր» հետազոտության  հեղինակները:

Հետազոտության արդյունքներն ուսումնասիրելիս, Panorama.am-ը տեղեկացավ, որ սննդամթերքի և տնտեսական ապրանքների գնման վերաբերյալ որոշումները հիմնականում կայացնում են կանայք: Հագուստի և ոսկերչական զարդերի գնման վերաբերյալ որոշումները նույնպես առավել շատ կայացնում են կանայք, ավելի հաճախ՝ հավասարապես:

Համանման օրինաչափություն է առկա նաև կահույքի գնման հարցում: Կենցաղային տեխնիկայի գնման հարցում որոշումները հավասարապես կայացնում են կանայք և տղամարդիկ:

Փոխադրամիջոցների/ ավտոմեքենաների գնման դեպքում որոշումն ընդունում են հիմնականում տղամարդիկ, երբեմն էլ հավասարապես կանայք և տղամարդիկ և շատ հազվադեպ՝ միայն կանայք:

Անշարժ գույքի գնման դեպքում դարձյալ տղամարդկանց դերը գերակշռող է, սակայն համատեղ որոշումներ ընդունվում են շատ ավելի հաճախ, քան փոխադրամիջոցների գնման դեպքում: