Բագրատյանի առաջարկի հետքերով. «Պակաս կարևոր չէ, թե ինչքանով են համատեղելի այդ ուժերը»

ԱԺ պատգամավոր, «Ազատություն» կուսակցության նախագահ Հրանտ Բագրատյանն օրեր առաջ լրագրողների հետ հանդիպմանը հայտարարեց,   որ 2017-ին կայանալիք խորհրդարանական ընտրություններում ընդդիմադիր ուժերը կարող են հաղթանակ տոնել, եթե կոալիցիա կազմեն: Նա նաև նշեց, որ համագործակցության առաջարկություն է արել «Ազատ դեմոկրատներ», «ՀԱԿ», «Ժառանգություն», «Նոր Հայաստան», «Քաղաքացիական պայմանագիր», «Հանրապետություն»,  ՀՀՇ կուսակցություններին:

Panorama.am-ի հետ զրույցում «Ազատ դեմոկրատներ» կուսակցության մամլո խոսնակ, վարչության անդամ  Անժելա Խաչատրյանը նշեց, որ  ընդդիմադիր դաշտի համախմբումը, ինչի մասին խոսել է Բագրատյանը, ինքնին դրական երևույթ է, սակայն պակաս կարևոր չէ նաև հաշվի առնել թե ինչքանով են համատեղելի համախմբվող ուժերը։

««Ազատ դեմոկրատներ» կուսակցությունը միշտ խոսել է այդ մասին, որ համախմբումը պետք է լինի ընդհանուր գաղափարական հենքի վրա, այսինքն տվյալ ուժերի պատկերացումները թե ներքաղաքական, թե արտաքին քաղաքական ու աշխարհաքաղաքական մարտահրավերների շուրջ պետք է համընկնեն»,-ասաց Ա. Խաչատրյանը:

Նա նաև մանրամասնեց, ինչ վերաբերում է Հրանտ Բագրատյանի հրավերին, ապա եղել է ոչ թե հրավեր, այլ քննարկումներ և ոչ միայն Բագրատյանի, այլև այլ քաղաքական ուժերի ու անհատների հետ։
«Այդ քննարկումներն եղել են ու ընթացքի մեջ են, դրանք նոր չէ որ սկսվել են և մեկ օրվա խնդիր էլ չէ՝ մենք ուզում ենք համախմբենք իրապեա ազատական մտածողությամբ անհատների և ուժերի»,-ասաց մամլո խոսնակը:

ԱԺ պատգամավոր, ՀԱԿ խմբակցության անդամ Արամ Մանուկյանը Panorama.am-ի հետ զրույցում ասաց, որ հրավեր չի եղել, բանավոր խոսել են:
«ՀԱԿ-ը դեռ որոշում չի կայացրել»,-ասաց նա:

ԱԺ պատգամավոր, ՀՀՇ-ական  Ալեքսանդր Արզումանյանն անդրադառնալով հարցին, նշեց. «Տասը տարի է՝ ասում ենք, որ բոլոր լիբերալ ուժերը պետք է միավորվեն ու միասին հանդես գան, ի՞նչ նորություն կա այդտեղ, որ այդքան զարմացրել է»:

Կուսակցությունը դեռ որոշման մասին հայտարարություն չի անի. «Ես Հրանտին ճանաչում եմ 30 տարի, մենք բոլոր լիբերալ ուժերի հետ էլ քննարկում ենք հնարավորությունները, ժամանակը կգա, կասենք»:

«Ժառանգություն» խմբակցության անդամ Զարուհի Փոստանջյանն անդրադառնալով հարցին, երեկ ասել էր, որ հարցը պետք է քննարկի կուսակցությունը: Քննարկելուց ու որոշում կայացնելուց հետո  տեղեկատվություն կտրամադրվի: