Օրենքով կխստացվի դեղերի հաշվառումն ու տրամադրումը. Առողջապահության նախարար

ՀՀ առողջապահության նախարար Արմեն Մուրադյանն այսօր լրագրողների հետ զրույցում հույս հայտնեց, որ այս տարի երկրորդ ընթերցմամբ կընդունվի «Դեղերի մասին» օրենքը, որն  ընդգրկում է ամբողջ շղթան՝ դեղերի ստեղծումից մինչև հիվանդին, շահառուին  հասնելը և կիրառման  ձևը:

«Կարծում եմ, որ դեղերի հետ կապված բոլոր հարցերի պատասխանները համապարփակ կարտացոլվեն նոր օրենքով»,- նշեց նախարարը:

Ինչ վերաբերում է կեղծ դեղերի առումով քրեական պատասխանատվության ենթարկելուն, Արմեն Մուրադյանն ասաց, որ նման մոտեցումներ կան տարբեր երկրներում և Հայաստանում նույնպես դա քննարկվելու է:

«Վարչական տարբեր լծակներ կան, որոնք առայժմ չեն կիրառվել և նոր օրենքով բավականին խստացվելու է և դեղերի հաշվառումը, և տրամադրումը և դուրսգրումը: Այս բոլոր օղակները այդ մեծ շղթայում պետք է ունենան վարչական լուրջ վերահսկողություն և կարծում եմ, որ խնդիրների մեծամասնությունը հնարավոր կլինի լուծել նոր օրենքի շրջանակներում»,- նշեց Արմեն Մուրադյանը: