Տիգրան Համասյան. Այս տարածքը, բնությունը ստիպեց, որ հենց այս ծրագրով հանդես գամ գյումրեցիներին օգնելու համար

Մեկ ժամ շարունակ հայտնի դաշնակահար Տիգրան Համասյանը գյումրեցիներին կտրեց առօրյա հոգերից  և գեղագիտական մեծ հաճույք պատճառեց իր անզուգական կատարումներով:

«Համերգին կատարեցի և հին, և նոր ստեղծագործություններ: Սկզբում ցանկանում էի միայն նոր ստեղծագործություններ կատարել կապված այն գաղափարի հետ, որ մեր նպատակն է նոր բնակարաններ գնել վագոն-տնակներում բնակվող ընտանիքներին: Բայց այս տարածքը, բնությունը ստիպեց, որ հենց այս ծրագրով հանդես գամ»,-  բարեգործական համերգից հետո լրագրողների հետ զրույցում ասաց Տ.Համասյանը: 

Հիշեցնենք, որ Տ.Համասյանը Գյումրիում հանդես եկավ բարեգործական համերգով՝ ի աջակցություն Գյումրու անօթևան ընտանիքների: Երկրաշարժից 28 տարի անց Գյումրիում դեռ ավելի քան 3000 ընտանիք ապրում է վագոն-տնակներում: Այդ ընտանիքներին օգնելու համար միջազգային դրամահավաք է սկսվել: Մինչև մարտի 15-ը 190 հազար դոլար հավաքելու դեպքում 13 ընտանիք բնակարանատեր կդառնա:

Նշենք, որ Տիգրան Համասյանը  պարգևատրվեց Գյումրու քաղաքապետի ոսկե մեդալով՝  ջազային և հայ հոգևոր երաժշտության զարգացման բնագավառներում ունեցած զգալի ներդրումի, մարդասիրական, բարեգործական ակտիվ գործունեության համար: