Համատեղ հայտարարություն առողջության պահպանման ոլորտում

«Հանրային առողջության նոր մարտահրավերները» միջազգային համաժողովի առանցքում էր մասնակից երկրների երևանյան համատեղ հայտարարությունը, որը ստորագրեցին Հայաստանի Հանրապետության առողջապահության, Ռուսաստանի Դաշնության առողջապահության, Իրանի Իսլամական Հանրապետության առողջապահության և բժշկական կրթության, Վրաստանի Հանրապետության աշխատանքի, առողջապահության և սոցիալական հարցերի, Բելառուսի Հանրապետության առողջապահության նախարարները և Ղազախստանի առողջապահության և սոցիալական զարգացման փոխնախարարը: Այս մասին տեղեկացնում են ՀՀ առողջապահության նախարարության հասարակայնության հետ կապերի բաժնից:

Պատվիրակների կողմից հանրային առողջության պահպանման ոլորտում ստորագրած համատեղ փաստաթուղթը հայտարարում է, որ հանրային առողջությունն ազգային անվտագության ապահովման համար ոչ միայն առաջնահերթ գործոն է, այլև հասարակության արդյունավետ գործունեության, սոցիալ-տնտեսական քաղաքականության չափանիշ: Հայտարարությունն առկա խնդիրները հաղթահարելու նպատակով հաստատում է միջտարածաշրջանային, միջպետական համագործակցության անրաժեշտությունը:

Նշենք, որ համաժողովի շրջանակում կուրվագծվեն և համատեղ կմշակվեն հիվանդությունների կանխարգելման և առողջության ամրապնդման ծրագրեր, որոնք ուղղված են վարքագծային ռիսկի գործոնների դեմ պայքարին:

Ուշադրության կենտրոնում է նաև բնակչության առողջության պահպանման ռազմավարությունների մշակումը, հանրային առողջության որակի վերահսկման նորմատիվների ստեղծումը, որոշումների կայացման համար ժամանակակից մեթոդների ներդրումը: Միջոցառումը նպատակ ունի նաև նպաստելու երկրների միջև համագործակցության զարգացմանը և լիովին օգտագործելու առկա կարողությունները հանրային առողջության ոլորտի խնդիրների վրա այլ երկրների ուշադրությունը հրավիրելու հարցում: Երկօրյա համաժողովի շրջանակում զեկույցներով հանդես կգան ՀՀ առողջապահության նախարարության առաջատար մասնագետները: Արտերկրի գործընկերների հետ ընդլայնված կքննարկվեն մոր ու մանկան առողջության պահպանմանը, հիվանդությունների վերահսկմանը և կանխարգելմանը, առողջապահության ցուցանիշների բարելավմանը վերաբերող հարցերը, կներկայացվեն հանրային առողջապահության մի քանի կարևոր ուղղություններով իրականացվող ծրագրերը, ինչպես նաև մանկական դիաբետի դեմ պայքարին ուղղված ազգային ծրագիրը:

Հայտարարության տեքստն այստեղ: