Պան Գի Մուն. Սիրիայի 15 շրջանում մոտ 500 հազար մարդ շարունակում է շրջափակման մեջ մնալ

Սիրիայում հրադադարի ռեժիմն ընդհանուր առմամբ պահպանվում է, չնայած առանձին միջադեպերին: ՏԱՍՍ-ի հաղորդմամբ, այս մասին հայտարարել է ՄԱԿ-ի գլխավոր քարտուղար Պան Գի Մունը:

«Ես կոչ եմ անում բոլոր կողմերին՝ կատարել իրենց խոստումները և ինքնակամ թույլ տալ կենսականորեն անհրաժեշտ հումանիտար օգնությունը հասցնել պաշարված շրջաններ»,- ասել է նա: 

Պան Գի Մունի խոսքով, Սիրիայի 15 շրջանում մոտ 500 հազար մարդ շարունակում է շրջափակման մեջ մնալ. «Շատ մարդիկ մահացել են սովից կամ անհրաժեշտ բժշկական օգնություն չստանալու պատճառով»:

Նա նաև ասել է, որ վերջին օրերին ՄԱԿ-ի գործակալությունը գործընկերների հետ միասին կարողացել է օգնություն հասցնել ավելի քան 80 հազար մարդու, իսկ առաջիկա 5-6 օրվա ընթացքում սննդամթերք, դեղորայք, առաջին անհրաժեշտության ապրանքներ կստանան ևս 140 հազար բնակիչներ:

Ըստ ՄԱԿ-ի գլխավոր քարտուղարի, սա հնարավոր է եղել իրականացնել հրադադարի ռեժիմի հաստատման շնորհիվ, որին հասել են Սիրիայի աջակցության Միջազգային խումբը:

Նշենք, որ Սիրիայում հրադադարի ռեժիմ է հաստատվել փետրվարի 27-ից: