Ամենից շատ կարդացված նյութեր
.jpg "Մեդիայի ներկայացուցիչներ. Սահմանափակումներն ԸՕ-ում աննախադեպ են")
«Ընտրական օրենսգրքի պատրաստումը շատ փակ գործընթաց էր: Քաղհասարակության ներկայացուցիչները, լրատվամիջոցները հետաքրքրվում էին, թե որտեղ ու ինչպես է պատրաստվում փաստաթուղթը, ուզում էին մասնակցել գործընթացին, ներկայացնել առաջարկություններ, բայց փաստորեն իշխանությունները չընդգրկեցին նրանց այդ գործում»:
«Մեդիա կենտրոնում» «Դիտորդների և լրագրողների սահմանափակումները նոր Ընտրական օրենսգրքի նախագծում» թեմայով քննարկման ժամանակ նման կարծիք հայտնեց Խոսքի ազատության պաշտպանության կոմիտեի նախագահ Աշոտ Մելիքյանը:
«Ստացվեց այնպես, որ փաստաթուղթը պատրաստվեց, ուղարկվեց Վենետիկի հանձնաժողով, իսկ երկրի ներսում հանրությունը տեղյակ չէր, թե ինչ փաստաթուղթ է դա»,-նկատեց Ա. Մելիքյանը:
Քննարկմանը մասնակցող «Հրապարակ» օրաթերթի գլխավոր խմբագիր Արմինե Օհանյանն էլ ավելացրեց, որ հայտնի էլ չէր, թե ովքեր մշակեցին Ընտրական օրենսգրքի նախագիծը:
Մելիքյանը մտավախություն հայտնեց, որ ԸՕ-ի նախագիծն էլ շատ արագ կանցկացնեն, առանց լայն քննարկումների:
Անդրադառնալով ընտրական տեղամասում դիտորդների, զանգվածային լրատվության միջոցների ներկայացուցիչների և վստահված անձանց թվի ու լիազորությունների սահմանափակմանը, Կոմիտեի նախագահը դրանք տարօրինակ որակեց, նշելով, որ դրանց համար հստակ ու ընդունելի հիմնավորումներ չկան:
Արմինե Օհանյանն էլ նման սահմանափակումներն օրենսգրքում ընդգրկելն աննախադեպ որակեց:
«Խնդիրն այն է, որ վերջին տարիների ընթացքում ընտրական գործընթացների նկատմամբ ունենք մեծ անվստահություն: Եթե իշխանությունը ցանկանում էր վստահությունը բարձրացնել, ի վերջո ես կարծում եմ, դա գլխավոր խնդիրներից մեկն է, ուրեմն պետք է խուսափեին ընդհանրապես սահմանափակումներից, այլ ոչ թե նման անհեթեթ դրույթ մտցնեին օրենքի մեջ»,-ասաց խմբագիրը, հիշելով, որ նախկինում քվեարկության ընթացքին հետևելու համար լրագրողներից ոչ բեյջեր, ոչ էլ հավատարմագրեր էին պահանջում:
Օհանյանը միաժամանակ նկատեց, որ ի տարբերություն 90-ական թվականների այսօր բազմաթիվ են լրատվամիջոցները, հետևաբար, լրագրողների թիվն անհամեմատ մեծ է, իսկ սահմանված 8 թիվը շատ փոքր է:
«Ես չեմ բացառում, որ ընտրության օրերին ստեղծվեն կեղծ լրատվամիջոցներ, ինչի հետևանքով տարիներ շարունակ գործող լրատվամիջոցների լրագրողները դուրս մնան այդ գործընթացից»,-ասաց նա:
Studio One