Արմեն Մուրադյանը՝ Քուշկյանի ՀՀ առողջապահության նախարար նշանակվելու մասին

Կառավարության այսօրվա նիստից հետո լրագրողները ՀՀ առողջապահության նախարար Արմեն Մուրադյանից հետաքրքվեցին, արդյոք ճիշտ են լուրերը, որ ինքն ազատվելու է պաշտոնից  և աշխատանքի է անցնելու Առողջապահության համաշխարհային կազմակերպությունում, նախարարը պատասխանեց. «Առաջին անգամ ձեզանից եմ լսում»:

«Լրատվության մեջ թյուրիմացությունն այն է, որ ստացված հրավերը վերաբերում է մայիսի 23-ից 28-ը ԱՀԿ-ի համաշխարհային վեհաժողովին համանախագահող լինելուն՝ ընդամենը 7 օրվա ընթացքում»,-ասաց Արմեն Մուրադյանը:

Այն հարցին, թե Լեռնային Ղարաբաղի Հանրապետության առողջապահության նախարար Հարություն Քուշկյանի՝ նախարարի պաշտոնից ազատվելուց հետո լուրեր են պտտվում, թե նշանակվելու է Հայաստանի առողջապահության նախարար, Արմեն Մուրադյանն արձագանքեց. «Որևէ մեկնաբանություն չունեմ, քանի որ առաջին անգամ ձեզանից լսեցի»:

Հիշեցնենք, որ ԼՂՀ առողջապահության նախարար Հարություն Քուշկյանն այսօր աշխատանքից ազատման դիմում է ներկայացրել: