Զառա Մխեյան. Փորձում ենք փրկել Ռամազոտիի երևանյան համերգը

Այս պահին FORPOSTART PRODUCTION-ը լրացուցիչ բանակցություններ է վարում Էրոս Ռամազոտիի՝ Trident Music Srl պրոդյուսերական ընկերության հետ՝ փորձելով փրկել երևանյան համերգը՝ ինչպես վարվեցին Թբիլիսիի և Բաքվի կազմակերպիչները: Նման հայտարարություն է տարածել Ֆորպոստարտ Պրոդաքշըն ընկերության գլխավոր տնօրեն Զառա Մխեյանը:

«Այժմ ես գտնվում եմ Մոսկվայում և սպասում եմ պաշտոնական հաստատման Անդրեյ Ագապովի կողմից: Համերգի՝ պաշտոնապես չեղյալ հայտարարվելուց հետո մենք դատական կարգով կպահանջենք Պատվիրատուի կողմից իր պայմանագրային պարտավորությունների չկատարման արդյունքում մեզ պատճառված նյութական վնասի փոխհատուցում, ինչպես նաև` բաց թողնված օգուտի, մեր կրած ծախսերի, բարոյական վնասի, մեր կազմակերպության գործարար համբավին պատճառված վնասի փոխհատուցում»,-ասված է հայտարարության մեջ:

Նշվում է, որ  FORPOSTART PRODUCTION-ը լրացուցիչ կտեղեկացնի տոմսերի վերադարձի ամսաթիվը. այն կտեղադրվի կայքում՝ www.forpostart.ru: Համերգի չեղյալ հայտարարվելու դեպքում GLOBAL COMMUNICATIONS ընկերությունն անհապաղ պետք է ծանուցի այդ մասին կատարողին:

«Սակայն մենք պարոն Ա. Ագապովից ոչ մի հաղորդագրություն չենք ստացել: Նշված  ծանուցումը ստանալուց անմիջապես հետո, անհապաղ կազդարարենք «Ենթագործակալներին» համերգի տոմսերի վաճառքը դադարեցնելու մասին: Լրացուցիչ հայտնում ենք, որ համերգի տոմսերը և դրանց վաճառքից գոյացած ամբողջ հասույթը հանդիսանում է GLOBAL COMMUNICATIONS ընկերության սեփականությունը»,-ասված է հայտարարության մեջ:

Հիշեցնենք, ՏԱՍՍ-ը՝  հղում կատարելով շրջագայության պրոդյուսեր Trident Music Srl ընկերությանը, հայտնում է, որ իտալացի երգիչ և երգահան Էրոս Ռամազոտտին չեղյալ է հայտարարել Perfetto համաշխարհային շրջագայության շրջանակներում Ռուսաստանում, Էստոնիայում և Հայաստանում կայանալիք իր համերգները: 

Ընկերության հայտարարության մեջ ասվում է, որ պրոդյուսերները խորապես ցավում են, որ ս/թ մարտի 26-ին Մինսկում կայացած համերգից հետո ստիպված են հայտարարել, որ դադարեցվում են Էրոս Ռամազոտտիի համերգային շրջագայությունները Ռուսաստանում, Էստոնիայում և Հայաստանում՝ տուրի ռուսաստանյան կազմակերպիչ GLOBAL COMMUNICATIONS ընկերության կողմից պայմանագրային պարտավորությունների խախտման պատճառով:

Ինչպես նշում է պրոդյուսերական ընկերությունը, ռուսաստանյան կազմակերպիչ GLOBAL COMMUNICATIONS-ը՝ ի դեմս Անդրեյ Ագապովի, «մեկ անգամ չէ, որ խախտել է պայմանագրով ամրագրված ֆինանսական պարտավորությունները՝ որոնք պետք է ուղղվեին Ռամազոտտիի համերգային շոուն միջազգային մակարդակով կազմակերպելու ծախսերի վճարմանը»: