Պաշտոնական Ստեփանակերտը հերքում է Ադրբեջանի հայտարարությունը կրակը դադարեցնելու մասին

«Միանգամայն այլ իրավիճակ է: Ադրբեջանի հայտարարությունը չի համապատասխանում իրականությանը: Վերջին 12 ժամվա ընթացքում նրանք երկու անգամ հայտարարել են դադարի մասին, բայց խոսքին տեր չեն կանգնում», -Panorama.am-ի թղթակցի հետ զրույցում հայտարարեց Արցախ նախագահի մամուլի խոսնակ Դավիթ Բաբայանը:

Նշենք, որ րոպեներ առաջ ադրբեջանական կողմը հայտարարել էր, որ միակողմանիորեն դադարեցնում է մարտական գործողությունները շփման գծում:

Հարցին, թե ի՞նչ նպատակ ունի նման մարտավարությամբ ադրբեջանական կողմը, Բաբայանն ի պատասխան ասաց, որ նրանց նպատակը միջազգային հանրությանը և հատկապես սեփական հասարակությանը մոլորեցնելն է:

«Նրանք գիտեն, որ միաջազգային ոչ մի կազմակերպություն չի գա և տեղում չի ստուգի իրավիճակը դրա համար էսպես հայտարարություններով փորձում են մոլորեցնել, բայց նրանց մոտ չի ստացվի: Սա բնորոշ է Ադրբեջանին և սա շահարկում է։

Մենք միշտ ասել ենք, որ պատրաստ ենք կառուցողական նորմալ երկխոսության և հակամարտության խաղաղ կարգավորման, սակայն սա չի նշանակում, որ թույլ ենք և չենք կարող պաշտպանել մեր անկախությունը, ազատությունն ու արժանապատվությունը», -մեզ հետ զրույցում հավելեց Բաբայանը: