Հոսպիտալում գտնվող 39 զինծառայողներից 3-ի վիճակը շարունակում է մնալ ծայրահեղ ծանր

Արցախում ադրբեջանական զինուժի ձեռնարկած  ռազմական գործողությունների հետևանքով վիրավորված զինծառայողներից 39-ը գտնվում են Երևանի կենտրոնական զինվորական հոսպիտալում: Ինչպես լրագրողների հետ զրույցում նշեց հոսպիտալի փոխտնօրեն Արտաշես Խաչատրյանը, վիրավորներից 36-ը զինծառայող են, 3-ը՝ ԵԿՄ անդամներ:

Նրա խոսքերով՝ վիրավորներից 7-ը գտնվում են վերակենդանացման բաժանմունքում. նրանցից 3-ի վիճակը շարունակում է մնալ ծայրահեղ ծանր, 4-ինը՝ ծանր կայուն:

Արտաշես Խաչատրյանը հայտնեց, որ այսօր նոր հիվանդներ չեն ընդունել, իսկ երեկ ընդունել են մեկ կամավորի, որն ունեցել է թեթև վիրավորում:

Նշվեց նաև, որ հոսպիտալից դուրս գրվողներ չեն եղել, սակայն եղել են վիրավորներ, որոնք վերակենդանացման բաժամունքից տեղափոխվել են համապատասխան բաժամունքներ։

«Այսօր նաև մեզ այցելել է առողջապահության նախարարը և միասին մեր մասնագետների հետ քննարկել ենք վերակենդանացման բաժամունքի հիվանդների բուժման հարցերը»,- ասաց նա: 

Հիշեցնենք՝ օրեր առաջ հոսպիտալի պետը հայտնել էր, որ ծանր վիճակում գտնվող վիրավորներից մեկի ողնաշարում դեռ բեկոր է մնում, երբ նրա վիճակը կայունանա, ապա երկրորդ անգամ կվիրահատեն, սակայն այսօր Արտաշես Խաչատրյանն ասաց, որ զինվորի վիճակը դեռևս չի կայունացել, պատրաստ չէ վիրահատական միջամտության. «Երբ կայունանա, նրան կվիրահատենք»:

Հոսպիտալի փոխտնօրենը դժվարացավ նաև ասել, թե վիրավորներից քանիսը հետագայում կունենան հաշմանդամության խնդիր. «Երբ արդեն կանցնեն վերականգնողական փուլ՝ նոր պարզ կլինի` կա՞ն արդյոք այդպիսինները, թե՞ ոչ»։

Նա նաև հայտնեց, որ ծայրահեղ ծանր վիճակում գտնվող Թորոսյան Հայկի ու Բաղդասարյան Հրայրի առողջական վիճակը բարելավվել է, նրանք արդեն տեղափոխվել են   համապատասխան բաժանմունք:

«Հայկի վիճակը ճիշտ է շարունակում է մնալ ծանր, բայց կայուն ու ավելի հուսադրող»,- ասաց նա: