Եթե ընտրակաշառք չբաժանվեր, Արամ Դանիելյանը հաղթելու շանս չէր ունենա. Փաշինյան

«Ես պնդում եմ, որ եթե ընտրակաշառք չբաժանվեր, ապա Արամ Դանիելյանը հաղթելու որևէ շանս չէր կարող ունենալ, որևէ շանս», -այսօր լրագրողների հետ հանդիպման ժամանակ հայտարարեց Սասուն Միքայելյանի նախընտրական շտաբի պետ, «Քաղաքացիական պայմանագիր» կուսակցության վարչության անդամ, ԱԺ պատգամավոր Նիկոլ Փաշինյանը:

Նրա խոսքով, կաշառք բաժանելու փաստը վկայում է, որ Արամ Դանիելյանը Հրազդանում չունի բավարար թվով աջակիցներ:

«Հակառակ դեպքում ի՞նչ իմաստ ունի փող բաժանել, ձայն ստանալու համար», -հավելեց պատգամավորը:

Արձագանքելով հայտարարություններին, թե «հանցագործ իշխանությունները ընդդիմությունից ձայներ են խլում», Փաշինյանը հայտարարեց, որ որևէ իշխանություն իրենցից ձայներ տանել չի կարող, քանի որ իրենք պաշտպանում են իրենց տված յուրաքանչյուր ձայն:

Նշենք, որ Հրազդանի քաղաքապետի ընտրություններում, ըստ ԿԸՀ տվյալների, Դանիելյանը ստացել է 12 510 ձայն, իսկ նրա հիմնական մրցակից, «Քաղաքացիական պայմանագիր» կուսակցության ներկայացուցիչ Սասուն Միքայելյանը` 10 267 ձայն: