Լոնդոնում ստեղծել են Պալմիրայում ոչնչացված Հաղթական կամարի կրկնօրինակը

Լոնդոնում ստեղծել են սիրիական հնագույն Պամիրա քաղաքի՝ «Իսլամական պետություն» ահաբեկչական խմբավորման կողմից ոչնչացված Հաղթական կամարի  կրկնօրինակը: Այս մասին գրում է Նյուզու.քոմ կայքը՝ հղում անելով Բի-Բի-Սի-ին:

Կամարի կրկնօրինակը ստեղծել են եգիպտական մարմարից 3D տեխնոլոգիայի կիրառմամբ՝ հիմք ունենալով հուշարձանի լուսանկարները: Այն տեղադրվել է Տրաֆալգարյան հրապարակում: Կամարը Մեծ Բրիտանիայի մայրաքաղաքում կմնա երեք օր, որից հետո կտեղափոխեն այլ քաղաքներ, այդ թվում նաև Նյու Յորք և Դուբայ: Պալմիրա կամարը կտանեն հաջորդ տարի:

2015-ի հոկտեմբերին հայտնի էր դարձել, որ ահաբեկիչները պայթեցրել են Հաղթական կամարը: Այն թվագրվում է մ.թ.2-րդ դարով:

2015թ-ի մայիսից Պալմիրան գտնվում էր «Իսլամական պետություն» ահաբեկչական խմբավորման զինյալների հսկողության տակ: Այս տարվա մարտի 24-ին սիրիական բանակը, ճեղքելով ԻՊ պաշտպանությունը, մտել է քաղաք: Պալմիրան ընդգրկված է ՅՈՒՆԵՍԿՕ-ի համաշխարհային մշակութային ժառանգության ցուցակում: