Կարծում ենք, որ Հովհաննեսն այս դժվար վիճակից դուրս կգա. Հոսպիտալի պետ

Արցախում հրազենային ծանր վիրավորում ստացած և Երևանի կենտրոնական կլինիկական զինվորական հոսպիտալ  տեղափոխված զինծառայող Հովհաննես Պողոսյանի առողջական վիճակն այս պահին գնահատվում է ծանր, բայց կայուն: Այս մասին Panorama.am-ի թղթակցի հետ զրույցում ասաց ՀՀ ՊՆ Կենտրոնական կլինիկական հոսպիտալի պետ Արամ Ասատուրյանը:

«Ունենք դանդաղ, բայց դրական ընթացք: Կարևորը, որը Հովհաննեսն արդեն արձագանքում է ձայներին: Նա ամենածանր վիրավորներից է, ստացել է գանգուղեղի հրազենային ծանր վիրավորում, գլխուղեղի սալջարդ, այլ բազմաբեկորային կոտրվածքներ։ Վիրավորի մոտ առկա էր ուղեղային կոմա»,- նշեց հոսպիտալի պետը:

Թեև դեռ շուտ է այդ մասին խոսելը, սակայն Արամ Ասատուրյանը կարծում է, որ Հովհաննեսի դեպքում ևս իրենք կհասնեն դրական արդյունքների:

«Հաշվի առնելով մեր նախադեպերը, կարծում եմ, որ լավ արդյունք կունենանք: Սակայն չպետք է  մոռանանք, որ դա նաև անհատական է, ամեն ինչ կախված է նրանից, թե ինչ վիրավորում է ստացել զինվորը և օրգանիզմն ինչպես կկարողանա այդ ամենը հաղթահարել: Իհարկե դեռ շուտ է այս մասին խոսել, բայց մենք կարծում ենք, որ Հովհաննեսն այս դժվար վիճակից դուրս կգա և նրա մոտ խորը հաշմանդամություն չի լինի»,- նշեց Արամ Ասատուրյանը:

Հիշեցնենք, որ 1995թ. ծնված Հովհաննես Էդուարդի Պողոսյանը հրազենային ծանր վիրավորում է ստացել մայիսի 13-ին  ՊԲ հյուսիսային ուղղությամբ տեղակայված զորամասերից մեկի պահպանության տեղամասում: Վիրավորում ստանալուց հետո զինծառայողը տեղափոխվել էր Մարտակերտի հոսպիտալ, վիրահատվել, ապա տեղափոխվել Ստեփանակերտի հոսպիտալ, իսկ հետո՝  Երևան:

Տեղեկացնենք նաև, որ զինծառայողը երկրորդ անգամ է վիրավորվում: Առաջին վիրավորումը ստացել էր ապրիլի առաջին օրերին՝ ոտքից, և ապաքինվելուց հետո վերադարձել էր ծառայության:

Զինվորական հոսպիտալում ևս երկու վիրավորի՝ Ավետիս Զարգարյանի ու Ռոլանդ Սահակյանի առողջական վիճակը շարունակում է մնալ կայուն ծանր: Նրանք երկուսն էլ ստացել են ողնաշարի ծանր վնասվածք:

Արամ Ասատուրյանը մեզ հետ զրույցում ասաց, որ հնարավոր է՝  երկու զինծառայողներին տեղափոխեն արտերկիր բուժման:

«Հարցը քննարկվում է պաշտպանության և առողջապահության նախարարների հետ, թե որտեղ և որ կլինիկայում շարունակեն նրանց հետագա բուժումը»,- ասաց նա:

Արամ Ասատուրյանը տեղեկացրեց նաև, որ ներկայումս զինվորական հոսպիտալում շարունակում է բուժում ստանալ ադրբեջանական ագրեսիայի հետևանքով վիրավորված 63 զինծառայող:

Հիշեցնենք, որ ղարաբաղյան հակամարտության հետևանքով վիրավորված զինծառայողներից Արման Լազգիյանը բուժումը շարունակում է Գերմանիայում, իսկ առաջիկա օրերին արտերկիր կմեկնի նաև Ռուբեն Առաքելյանը: