Անցյալի ողբերգություններին հղումներ են արվում բացառապես միայն օգնելու հիմքեր գցելու համար. Հռոմի Պապի խոսնակ

«Սուրբ Պետրոսի տաճարի արարողությունից հետո որոշ պահեր, իհարկե, եղան  թյուրիմացական, բայց, ըստ իս, Սուրբ Աթոռի և Թուրքիայի  իրական հարաբերությունները լավն են, չեմ կարծում, թե պատճառ կա մեծ խնդիրներ այստեղ տեսնելու»,-Գյումրիի մամուլի կենտրոնում  հայաստանցի և արտասահմանցի  լրագրողների հետ հանդիպման ժամանակ ասաց Հռոմի Պապի խոսնակ մոնսինյոր Ֆեդերիկո Լոմբարդին՝ պատասխանելով  հարցին, ինչպե՞ս կարձագանքի Թուրքիան Հռոմի պապի այցելությանը Հայաստան, հաշվի առնելով Սուրբ Պետրոսի տաճարում 2015 թ. ապրիլի 12-ին կայացած արարողությունից հետո Թուրքիան հակասական տրամադրվեց Վատիկանի հանդեպ: 

«Անցյալի պատմակն ողբերգություններին հղումներն արվում են ոչ թե նորոգելու, վերաբացելու համար վերքերը, կոնֆլիկտները, այլ արվում են բացառապես միայն օգնելու հիմքեր գցել փոխադարձ ընկալման, ըմբռնման, երկխոսության, հաշտեցման համար: Միայն այդ նպատակով»,- նշեց նա:

Ֆեդերիկո Լոմբարդին նշեց, որ Հայաստանի նախագահն իր խոսքում այս իմաստով նույնպես լավ ձևակերպումներ ուներ՝ միտված խաղաղությանը, հաշտեցմանը:

«Ինչքան հիշում եմ, նա նույնպես օգտագործեց ներողամտություն բառն այն իմաստով, որով հենց  Հռոմի պապն այն օգտագործել էր՝  խոսելով հայ ազգի հիշողության մասին: Խոսքը վերաբերում է ապագան կառուցելուն, որը խաղաղության և հաշտեցման ապագա է, փոխադարձ ընկալման և ներդաշնակության:  Սա պետք է աներկբա, հստակ լինի: Սա է մտադրությունը, իսկ եթե թյուր մեկնաբանություն են արվում, Հռոմի պապից կամ ինձանից կախված չէ»,- նշեց ասաց Հռոմի Պապի խոսնակը: