Ստամբուլի ահաբեկչության մասնակցության կասկածանքով մի քանի տասնյակ մարդ է ձերբակալվել

Ստամբուլի Աթաթուրքի անվան օդանավակայանում իրականացրած ահաբեկչական գործողություններին մասնակցելու կասկածանքով ձերբակալվել է 30 մարդ: Այսօր այդ մասին հայտարարել է Թուրքիայի նախագահ Ռեջեփ Թայիփ Էրդողանը:

«Նրանց  ձերբակալումը կօգնի կարևոր եզրահանգումներ անել: Ինչպես տեսնում եք, նրանց թվում կան Դաղստանի, Ղրղզստանի, Տաջիկստանի քաղաքացիներ»,-«Լենտա.ռու»-ի փոխանցմամբ, ասել է Էրդողանը:

Նա նշել է, որ քննության ընթացքում  անհրաժեշտություն է առաջանալու գործ ունենալ հարևան երկրների հետ: Թուրքիայի նախագահը հայտարարել է, որ իր երկիրը շարունակելու է ահաբեկչության դեմ պայքարը բոլոր ճակատներով:

Ադրբեջանական լրատվամիջոցների փոխանցմամբ էլ, Ստամբուլի ահաբեկչության մասնակցության կասկածանքով կալանավորվել է նաև Ադրբեջանի կին քաղաքացի ՝ Էլչին Բունյադովը:

Հիշեցնենք, որ Ստամբուլի օդանավակայանում հունիսի 28-ին մահապարտ երեք ահաբեկիչներ կրակ էին բացել: Այնուհետև նրանցից երկուսն իրենց պայթեցրել են տերմինալի ներսում, մյուսը՝ դրսում: Վերջին տվյալների համաձայն, դրա հետևանքով զոհվել է 45, վիրավորվել 200 մարդ: