Ներսում գտնվող մարդկանց նկատմամբ այս պահի դրությամբ հատուկ միջոցառում ծրագրված չէ իրականացնել. Հունան Պողոսյան

Երևանի Ազատության հրապարակում մի խումբ քաղաքացիներ հանրային քննարկում էին անում՝ ներկա իրավիճակի, հետագա քայլերի հետ կապված: Առաջարկ հնչեց երթով շարժվել դեպի ՀՀ ոստիկանության պարեկապահակային ծառայության (ՊՊԾ) գնդի տարածք:  Երևանի ոստիկանապետ Աշոտ Կարապետյանը ակտիվիստ Դավիթ Սանասարյանին տեղեկացրեց, որ  ակցիա կարող են իրականացնել, բայց երթի թույլտվություն չեն տալու:

«Իրավիճակն այնպիսին է, որ պետք է այնպես անել, որ որևէ քաղաքացի օրենքը չխախտի»,- ասաց նա:

Պատասխանելով հարցին, թե արդյո՞ք մտավախություն ունեն, որ անկարգություններ կլինեն, Երևանի ոստիկանապետն ասաց. «Անկարգ, օրենքը խախտող մարդկանց  մոտ գնացողները կարող են անկարգություններ անել»:

Հավաքված մարդկանց հետ խոսեց Հայաստանի ոստիկանության պետի առաջին տեղակալ Հունան Պողոսյանը: Երբ քաղաքացիները բողոքեցին ոստիկանների կողմից բռնություններից, փոխոստիկանապետը խոսք տվեց, որ այն ոստիկանները, ովքեր խախտել են օրենքը, քաշքշել քաղաքացիներին, անպայման կպատժվեն: Նա նշեց, որ  ամենաշահագրգռվածներն իրենք են, որ  արյունահեղություն, կամ որևէ բան չլինի՝ 2-3 օրվա իրենց գործողությունները խոսում են այդ մասին:

«Գնում են բանակցություններ, նորմալ վիճակ է: Բանակցությունների արդյունքում պատանդներ են արձակվում: Ներսում գտնվող մարդկանց նկատմամբ այս պահի դրությամբ հատուկ միջոցառում ծրագրված չէ իրականացնել»,- նշեց փոխոստիկանապետը: