Ամենից շատ կարդացված նյութեր
.jpg "Բանակցություներին այլընտրանք չեմ տեսնում. Բորիս Նավասարդյան")
«Եթե նրանք հայտարարեին, որ միայն եկել են Ժիրայր Սեֆիլյանին ազատեն, կհասկանայի, որ սա ընկերական կամ ռազմական պատվախնդրության հարց է, բայց քանի որ բարձրացնում են հրաժարականի և նոր ընտրությունների՝ ժողովրդավար համակարգի ստեղծման հարց, ապա դա դասական խռովության նշան է»,- այս մասին այսօր լրագրողների հետ հանդիպման ժամանակ ասաց սոցիոլոգ Ահարոն Ադիբեկյանը՝ անդրադառնալով ՊՊԾ գնդի տարածք մուտք գործած «Սասնա ծռեր» զինված խմբի անդամների գործողություններին:
Նրա խոսքերով՝ այդ գործողությունները ահաբեկչություն կարելի է համարել այնքանով, որ նրանք որպես թիրախ վերցրել են ոչ թե բուն մեղավոր կողմին, այլ՝ երկրորդական դեմքերին, որոնք առնչություն չունեն այդ խնդրի հետ:
Ահարոն Ադիբեկյանը չի կարծում, որ «Սասնա ծռեր»-ի քայլերը ի վերջո կբերեն նրան, որ ժողովուրդը ոտքի կանգնի:
«Սոցհարցումները ցույց են տվել, որ հայ ժողովուրդը հեղափոխական չէ: Հարցին՝ եթե ձեր հիմնական իրավունքները ոտնահարվել են, ապա ինչ քայլերի կդիմեք, 17 տոկոսը պատասխանել է՝ դուրս կգան փողոց ու ուժով կպաշտպանեն իրենց իրավունքները, 25 տոկոսը՝ հանրահավաք, ստորագրահավաք կանցկացնի: Մնացածը՝ թամաշա անողներ են: Ուրեմն այս ժողովրդին հանել ոտքի ընդդեմ իշխանության, անհնար է, քանի որ դա մեր բնույթը չէ: Մնում է միայն մեկ ճանապարհ՝ գնալ տեռորի»,- ասաց Ա.Ադիբեկյանը:
Սոցիոլոգը տեռորը միայն որպես բացասական երևույթ չի գնահատում: Տեռորը, ըստ նրա, թույլի ուժն է ուժեղի դեմ. «Եթե ուժեղն անբարոյական է, վատն է կամ մարդասեր չէ, և այլն, տեռորն արդարացված է: Հակառակ դեպքում տեռորը ոչ մի արդարացում չունի այն տեսակետից, որ զոհվում են մարդիկ, որոնք անմիջական կապ չունեն այն խնդրի հետ, որ իրենք փորձում են լուծել»:
Երևանի մամուլի ակումբի նախագահ Բորիս Նավասարդյանը նշեց, որ առանձին իրավիճակներում ցանկացած ժողովուրդ կարող է հեղափոխական դառնալ, և նախ զանգվածները պետք է հավատան, որ իրենք բավարար ուժեղ առաջնորդի կոչով են ելնում ոտքի և պետք է վստահեն այդ առաջնորդին:
Նրա խոսքերով՝ վստահության պակասն ու հավատի բացակայությունը, որ լիդերը բավարար ուժեղ է, ինչ-որ տեղ ձեռնպահ էին պահում ժողովրդին խռովություններից և իշխանության դեմ զանգվածաբար հանդես գալուց:
«Կոնկրետ այս դեպքում թերահավատությունը շատ մեծ էր, եթե նույնիսկ որոշ մասի մոտ կար համակրանք «Սասնա ծռեր»-ի նկատմամբ, ապա դա երեք օր առաջ ավելի պասիվ էր: Կարծում եմ՝այդ պասիվ համակրանքն այդպես էլ կմնար, բայց ինձ թվում է՝ շատ կարևոր է վերլուծել, թե ինչ կատարեց իշխանությունը, ինչի հետևանք էր այն, ինչ սկսվեց երեկվանից: Դա հենց իշխանությունների գործողությունների հետևանքն էր: Եթե երեք օր առաջ մենք ունեինք մեկ թեմա՝ Սէֆիլյանին ազատել, ապա երեկ միգուցե առաջին շարք դուրս եկավ մեկ այլ թեմա՝ մարդու իրավունքների զանգվածային խախտումների թեման ոստիկանության կողմից, և այստեղ արդեն շահագրգռված և ակտիվ մասնակիցների քանակը կտրուկ մեծացավ»,- ասաց Բորիս Նավասարդյանը:
Նրա խոսքերով՝ իշխանություններն այսօր ավելի լուրջ խնդրի առաջ են կանգնած, քան երեք օր առաջ: Ըստ նրա՝ եթե երեք օր առաջ ուղղակի պետք էր բանակցությունների միջոցով ինչ-որ հանգուցալուծում գտներ այս ուժային գործողությունների դեմ, այսօր պետք է հասկանալ՝ ինչ կարելի է անել ակտիվացած հասարակության հետ, որը չի վստահում իշխանություններին, որը միգուցե պասիվ ձևով իշխանափոխություն է ցանկանում և, թեև չունենալ հստակ ծրագիր և առաջնորդներ, ամեն դեպքում տրամադրությունները իշխանությունների համար շատ ավելի վտանգավոր են:
«Կարծում եմ, որ այս դեպքում իշխանությունը կկիրառի իր ավանդական մեթոդը՝ ոչ թե բռնի ուժով մարդկանց կմեկուսացնի, այլ կհոգնեցնի նրանց և չունենալով լիդեր և գաղափարներ, նրանք գնան տուն»,- նշեց Բորիս Նավասարդյանը:
Հոգեբան Սամվել Խուդոյանն էլ գտնում է, որ իշխանությունը վախենում է ծայրահեղ քայլերի գնալ, քանի որ այդ դեպքում մեծ թվով մարդիկ ոտքի կկանգնեն: Նրա խոսքերով՝ բանակցությունների միջոցով հարցը լուծում կստանա:
«Կարծում եմ, որ չհրապարակվող բանակցություններ կլինեն, իշխանության կողմից խոստումներ կլինեն, ներքին համաձայնություն կլինի և կհանձնվեն: Տղաների վրա հարձակման չեն գնա»,- ասաց հոգեբանը:
Բորիս Նավասարդյանն էլ նշեց, որ բանակցություններն արդյունավետ կլինեն:
«Բանակցություններով ամեն ինչ արվում է, որ արյունահեղություն չլինի: Ես բանակցություներին այլընտրանք չեմ տեսնում, թեև դա երկար կարող է տևել, բայց դա այն գինն է, որ պետք է պատրաստ լինեն իշխանությունները վճարել»,-ասաց Բորիս Նավասարդյանը:
Ահարոն Ադիբեկյանն էլ կարծում է, որ երկու կողմն էլ զիջումների չեն կարող գնալ:
«Զիջումն իշխանության կողմից նշանակում է, որ ապագայում դու կարող ես այս ճանապարհով որոշումների վրա ազդել, իսկ եթե տղաները զիջեն, ապա կստացվի, որ նրանք հերոս չեն»,- եզրափակեց նա:
Ինչ վերաբերում է «Սասնա ծռեր» զինված խմբի գործողություններին և նրանց հոգեվիճակին, հոգեբան Սամվել Խուդոյանն ասաց, որ իրենց մոտ չարդարացված էյֆորիա է:
«Ես այդ մարդկանց ընկալում եմ ինքնազոհաբերության գնացող մարդիկ, կարծեք իրենք իրենց մատաղ են անում և իրավիճակը ոչ այնքան սթափ են գնահատում, քանի որ այն ժամանակը չէր, որ նման բան կարելի էր անել»,-ասաց հոգեբանը:
Studio One