Ենիգոմշյանը կալանավորվեց

Կենտրոն և Նորք-Մարաշ վարչական շրջանների ընդհանուր իրավասության դատարանը բավարարեց   «Հիմնադիր խորհրդարան»-ի անդամ Ալեք Ենիգոմշյանին  կալանավորելու վերաբերյալ միջնորդությունը: Նա կտեղափոխվի «Արմավիր» քրեակատարողական հիմնարկ:  Այս մասին Panorama.am-ին հայտնեց Ենիգոմշյանի փաստաբան Նիկոլայ Բաղդասարյանը:

«Ենիգոմշյանի վերաբերյալ երկու ամսով կալանավորելու որոշում կայացվեց: Ես պատրաստվում եմ բողոքարկել, անհամաձայնությունս ներկայացնել»,-ասաց Բաղդասարյանը:

Նա ցավ հայտնեց, որ հայաստանյան դատական համակարգը գտնվում է այնպիսի վիճակում, երբ «դատավոր Մեսրոպ Մակյանը պետք է անկաշկանդ վիճակում լիներ, ամբողջ իր վարքագիծը  նման էր հաշվեհարդարի»:

Բաղդասարյանի ներկայացմամբ՝ դատավորը Ենիգոմշյանից պահանջել է իր հետ խոսել կանգնած վիճակում, այդ ընթացքում նայել իրեն:

«Դատավորը պետք է գիտակցի, որ հաշմանդամություն ունեցող անձի հետ է  աշխատում: Այդ մարդը չի տեսնում, կանգնելը հարմար չի: Դատավորը պետք է անշահախնդիր լինի, ակնհայտ երևում էր, որ անաչառ մարմինը չէ, որ կարող անաչառ դատավարություն իրականացնել, իրենց կայացրած որոշումը զուտ հաշվեհարդարի բնույթ ուներ»,-ասաց փաստաբանը:

Նա խոստացավ առաջին իսկ հնարավորության դեպքում հրապարակել դատական նիստի արձանագրությունը. «Կտեսնեք, թե ինչ դատավարություն է եղել: Դա դատավարություն չէր, ոնց որ ասեին, մենք հավաքվել ենք, որ ձեզ անպայման կալանավորենք»:

ԱԱԾ-ից ավելի վաղ հայտնել էին, որ ԵՆիգոմշյանը ( Կոմշույանը) կասկածվում է ՀՀ քրեական օրենսգրքի 38-219-րդ հոդվածի 3-րդ մասի 1-ին կետով նախատեսված հանցագործության՝ կազմակերպված խմբի վերոգրյալ հանցավոր գործողություններին օժանդակելու մեջ: