Արսինե Խանջյանի փաստաբանները դիմելու են դատարան՝ բողոքարկելու ոստիկանության գործողությունները

Կանադահայ հայտնի դերասանուհի Արսինե Խանջյանի փաստաբանները դիմելու են ՀՀ վարչական դատարան՝ ոստիկանության գործողությունները ոչ իրավաչափ ճանաչելու համար,- Panorama.am-ին տեղեկացրեց Ա.Խանջյանի պաշտպաններից՝ Փաստաբանների պալատի անդամ Արամազդ Կիվիրյանը:

«Դիմելու ենք դատարան, որպեսզի ոստիկանության գործողությունները՝ անձին ազատությունից զրկել, բերման ենթարկել, այնտեղ անհիմն պահել, հեռախոսն առգրավել,...  ճանաչվեն ոչ իրավաչափ: Իրավունքի այլ բազմաթիվ խախտումներ էլ կան, նաև այն, որ, ըստ էության, փաստաբաններին հնարավորություն չի տրվել մուտք գործել ոստիկանության համապատասխան զորամաս, որպեսզի իրավական օգնություն մատուցվի: Այս մասով նաև հաղորդում ենք ներկայացրել ոստիկանություն, ընթացքի մասին դեռևս նորություններ չունենք»,- մանրամասնեց փաստաբանը:

Ա.Կիվիրյանն ասաց, որ դատարան դիմելու համար արդեն սկսել են աշխատանքը:

Հիշեցնենք, որ դերասանուհի Ա. Խանջյանին   ոստիկանություն է տարվել հուլիսի 27-ին Խորենացի փողոցից: Ավելի վաղ լրագրողների հետ հանդիպմանը նա ասել էր, որ ոստիկանները խուզարկել էին իր պայուսակը, ազատ էին արձակել երեք ժամ պահելուց հետո, զղջացել էին և ներողություն խնդրել իրենից: