Հիլարի Քլինթոնի դեմ դատական հայց է ներկայացվել

2012-ին Բենգազիում (Լիբիա) ԱՄՆ դեսպանատան վրա կատարված հարձակման ժամանակ մահացած երկու ամերիկացիների ծնողները նախագահի պաշտոնի համար ընտրապայքարի մեջ մտած Դեմոկրատական կուսակցության թեկնածու Հիլարի Քլինթոնի դեմ հայց են ներկայացրել։

Fox News-ի փոխանցմամբ, հայցվորները Հիլարի Քլինթոնին մեղադրում են ոչ իրավաչափ գործողություններ կատարելու մեջ, որոնց հետևանքով իրենց որդիները մահացել են, ինչպես նաև՝ բարոյական վնաս պատճառելու համար։

Հայցը ներկայացրել են Սին Սմիթի մայրը՝ Պատրիսիա Սմիթը և Չարլզ Վուդսը՝ Տիրոն Վուդսի հայրը։

Ըստ աղբյուրի, հայցում նշվում է, որ Քլինթոնի կողմից մասնավոր էլեկտրոնային հասցեի օգտագորումը կարող էր նպաստել ահաբեկիչների գործողություններին, քանի որ հնարավոր է դրա միջոցով են նրանք իմացել Բենգազիում դեսպանի գտնվելու վայրը։

Նշվում է, որ Քլինթոնի նախընտրական շտաբը հայցի վերաբերյալ մեկնաբանություն դեռ չի արել։